इस्लामपूर : येथील पेठ रस्त्यावरील लक्ष्मी-नारायण कोविड उपचार केंद्रात बेकायदा जमाव जमवून डॉ. सचिन सांगरुळकरसह त्यांच्या पत्नी, कर्मचाऱ्यांना शिवीगाळ, दमदाटी करण्यात आली होती. याप्रकरणी पोलिसांनी सोमवारी शाकीर तांबोळी याला अटक केली. न्यायालयाने दोन दिवस पोलीस कोठडीत ठेवण्याचे आदेश दिले. पोलिसांनी यापूर्वी चौघांना अटक केली आहे.
कापूसखेड येथील रुपाली पाटील यांचे पती धोंडीराम पाटील यांच्यावर डॉ. सांगरुळकर यांच्या रुग्णालयात कोविड उपचार सुरू होते. तेथे त्यांचे २ मे रोजी निधन झाले. या घटनेने संतप्त कुटुंबीयांनी उपचारात हलगर्जीपणा झाल्याचा आरोप करत दंगा केला होता. त्यानंतर ७ मे ला गणेश पाटील, रामदास कचरे, सचिन खराडे, चंद्रकांत पाटील, शाकीर तांबोळी यांच्यासह ५०-६० जणांनी जमावबंदी आदेशाचा भंग करत रुग्णालयात घुसून डॉक्टरांसह त्यांच्या पत्नी आणि कर्मचाऱ्यांना शिवीगाळ व दमदाटी केली होती. तसेच आदळआपट केली होती. याप्रकरणी डॉ. सांगरुळकर यांनी पोलिसांत फिर्याद दिली होती.
तांबोळी याला सोमवारी येथील न्यायालयासमोर हजर केले. न्यायालयाने तांबोली याला बुधवारपर्यंत पोलीस कोठडीत ठेवण्याचे आदेश दिले. सहायक पोलीस उपनिरीक्षक बळीराम घुले अधिक तपास करत आहेत.