सांगली : सांगली स्पोर्टस् फौंडेशनची राष्ट्रीय खेळाडू रसिका रवींद्र माळी हिची ‘रश्मी राॅकेट’ या चित्रपटासाठी निवड झाली आहे. हा चित्रपट खेळावर आधारित आहे.
या चित्रपटात अभिनेत्री तापसी पन्नू मुख्य भूमिकेत आहे. गुजरातमधील रश्मी नावाच्या वेगवान धावपटूच्या जीवनावर आधारित हा चित्रपट आहे. या तरुणीला गावकऱ्यांनी राॅकेट हे नाव दिलेले आहे. या चित्रपटासाठी सांगलीची धावपटू रसिका माळी हिची निवड करण्यात आली आहे. रसिका ही राष्ट्रीय खेळाडू आहे. या चित्रपटाचे काही चित्रीकरण लोणावळा, बाणेर, बालेवाडी येथे झाले असून पुढील चित्रीकरण झारखंडच्या रांची येथील क्रीडांगणावर होणार आहे.
निवडीबद्दल संघटनेचे अध्यक्ष मकरंद चितळे, खजिनदार प्रमोद शिंदे, प्रशिक्षक एस. एल. पाटील, यांनी शुभेच्छा दिल्या. तिला शाहीर देवानंद माळी, उपाध्यक्ष संजय परमणे, राजू बावडेकर यांचे मार्गदर्शन लाभले.