लोकमत न्यूज नेटवर्क
सांगली : कोरोनामुळे लागू करण्यात आलेल्या कडक निर्बंधाच्या कालावधीत फळविक्रीच्या नावाखाली दारूची विक्री करण्यात येत असल्याचा प्रकार समोर आला. निर्बंध कालावधीत फळ विक्रेत्यांना परवानगी असल्याने फळविक्रेत्याचे ओळखपत्र मिळवून संशयिताने विश्रामबाग परिसरात दारूविक्री सुरू केली होती. सदाशिव गौडाप्पा दुधाळ (रा. उत्तर शिवाजीनगर, सांगली) असे संशयिताचे नाव असून पोलीस आणि महापालिकेच्या पथकानेही ही कारवाई केली.
शासनाने लागू केलेल्या कडक निर्बंधांमध्ये अत्यावश्यक सेवा वगळता इतर सर्व सेवा बंद आहेत. मात्र, फळे व भाजीपाला विक्रीस परवानगी आहे. नेमका याचाच फायदा घेत संशयिताने विश्रामबाग येथील चिनार हॉटेल परिसरात फळ विक्रीसाठी ओळखपत्र मिळवत देशी दारू विक्री सुरू केली होती. याबाबतची माहिती मिळताच पथकाने त्यास ताब्यात घेतले असता, त्याच्याजवळील पोत्यात २८ देशी दारूच्या बाटल्या मिळून आल्या. विश्रामबाग पोलिसांनी त्यास ताब्यात घेतले असून दुधाळ याच्याविरोधात गुन्हा दाखल करण्याची प्रक्रिया उशिरापर्यंत सुरू होती.