लोकमत न्यूज नेटवर्क
कडेगाव :
शहरात दिवसेंदिवस कोरोना संसर्ग वाढत चालला आहे. वाढती रुग्ण संख्या धोकादायक ठरत असल्याने शहरात दि. ५ मे अखेर सात दिवसांचा जनता कर्फ्यू पाळला जात आहे. दरम्यान गुरुवारी पहिल्याच दिवशी जनता कर्फ्यूला उत्स्फूर्त प्रतिसाद मिळाला. ब्रेक द चेन साठी शहरातील दवाखाने, औषध दुकाने व दूध संकलन वगळता सर्व दुकाने बंद शंभर टक्के बंद ठेवली होती. शहरातील मुख्य बाजारपेठेसह सर्वत्र शुकशुकाट होता.
वाढत्या रुग्ण संख्येच्या पार्श्वभूमीवर शहरात सात दिवसांचा जनता कर्फ्यू पाळण्याचा निर्णय कडेगाव नगरपंचायत, व्यापारी, भाजी विक्रेते व लोकप्रतिनिधी, पोलीस प्रशासन आणि कडेगाव शहर आपत्ती व्यवस्थापन समितीच्या बैठकीत झाला होता. या निर्णयाचे अनुषंगाने शहरात कडकडीत शंभर टक्के बंद पाळण्यात आला.
तालुक्यात आणि विशेष करून शहरात रुग्ण संख्येचा आकडा मोठ्या प्रमाणात वाढला आहे. शहरातील रुग्ण संख्या आता ३५० पर्यंत पोहचली आहे. वाढती रुग्ण संख्या घातक ठरत असल्यामुळे बंद पाळण्यात येत आहे. या बंदमुळे शहरातील वाढती रुग्ण संख्या कमी होईल असा अंदाज आहे. दरम्यान, गुरुवारी पहिल्याच दिवशी जनता कर्फ्यूला उत्स्फूर्त प्रतिसाद मिळाला आहे. व्यापारी संघटनांसह भाजीपाला व इतर विक्रेते यांनी या बंदला पाठिंबा दिल्याने शहरात सर्वत्र शुकशुकाट पसरला होता. सर्वांनी शासनाचे नियम पाळावे व कायदा सुव्यवस्था राहावी यासाठी पोलीस निरीक्षक पांडुरंग भोपळे यांच्या मार्गदर्शनाखाली मोठा पोलीस बंदोबस्त तैनात करण्यात आला होता.