इस्लामपूर : भाजपचे आमदार गोपीचंद पडळकर यांचे समर्थक, विट्याचे युवा नेते राजू जानकर, प्रा. नारायण खरजे यांनी प्रदेशाध्यक्ष, जलसंपदा मंत्री जयंत पाटील यांच्या उपस्थितीत राष्ट्रवादी काँग्रेस पक्षात प्रवेश केला. युवक राष्ट्रवादीचे प्रदेशाध्यक्ष मेहबूब शेख, कार्याध्यक्ष रविकांत वरपे यांनी त्यांचे पक्षात स्वागत केले. राजू जानकर यांची युवक राष्ट्रवादीचे प्रदेश सरचिटणीस व प्रा. नारायण खरजे यांची प्रदेश सचिवपदी निवड करण्यात आली. दोन्ही नूतन पदाधिकाऱ्यांनी राजारामबापू कारखाना कार्यस्थळावर राजारामबापू पाटील यांच्या पुतळ्यास अभिवादन केले.
राष्ट्रवादी काँग्रेसचे जिल्हा सरचिटणीस बाळासाहेब पाटील, तालुकाध्यक्ष विजयराव पाटील यांनी जानकर व प्रा. खरजे यांचे कारखाना कार्यस्थळावर सत्कार केला. यावेळी अवधूत कस्तुरे (बलवडी), प्रा. प्रवीण गावडे (इस्लामपूर), हॅन्डबॉल प्रशिक्षक शशिकांत पवार प्रामुख्याने उपस्थित होते.
राजू जानकर म्हणाले, राष्ट्रवादी काँग्रेसचे प्रदेशाध्यक्ष जयंत पाटील यांच्या नेतृत्वावर विश्वास ठेवून आम्ही राष्ट्रवादी काँग्रेस पक्षात प्रवेश केला आहे. त्यांनी आम्हास राज्य पातळीवर काम करण्याची संधी देऊन आमच्यावर जो विश्वास दाखविला आहे, तो जोरदार काम करून सार्थ करून दाखवू. प्रा. खरजे म्हणाले, समाजाचे, युवकांचे प्रश्न राहिले बाजूला, आमच्या नेत्याची फक्त स्टंटबाजी चालू होती. मात्र आता राष्ट्रवादी काँग्रेस व जलसंपदा मंत्री जयंत पाटील यांच्या नेतृत्वाखाली गोर-गरीब कुटुंबातील युवकांच्या हाताला काम देऊन त्यांना स्वतःच्या पायावर उभा करण्याचा प्रयत्न करू.
फोटो : ०२ इस्लामपुर १
ओळी : राजारामनगर येथे राजारामबापू पाटील यांच्या पुतळ्यास युवक राष्ट्रवादीचे नूतन प्रदेश सरचिटणीस राजू जानकर व प्रदेश सचिव प्रा. नारायण खरजे यांनी अभिवादन केले. यावेळी बाळासाहेब पाटील, विजयराव पाटील, अवधूत कस्तुरे, प्रा. प्रवीण गावडे उपस्थित होते.