सांगली : पेट्रोल आणि डिझेलची घोडदौड अजूनही सुरूच आहे. पेट्रोलने शंभरी ओलांडल्यानंतरही दरवाढ थांबण्याचे नाव घेईना, तर डिझेल शंभरीच्या दिशेने वाटचाल करू लागले आहे.
वाहनचालकांसाठी इंधनाची महागाई कंबरडे मोडणारी ठरली आहे. पेट्रोलच्या किमती शंभरी गाठल्यावर तरी स्थिर राहतील अशी अपेक्षा होती; पण अपेक्षा फोल ठरली आहे. मंगळवारी (दि. २२) पेट्रोल चक्क १०४ रुपयांवर पोहोचले. शंभर रुपयांच्या नोटेत ९६० मिली पेट्रोल मिळू लागले आहे. त्यामुळे वाहनचालक हबकले आहेत. सर्वसामान्यांचे पेट्रोलचा महिन्याचा खर्च आटोक्याबाहेर जात आहे. सांगलीत मंगळवारी पेट्रोल प्रतिलीटर १०३.४३ रुपयांनी विकले जात होते. ग्रामीण भागात १०४ रुपयांपर्यंत पोहोचले होते.
स्पीड पेट्रोल प्रतिलीटर १०६.२८ रुपयांवर गेले आहे. ग्रामीण भागात १०७ रुपयांपर्यंत पोहोचले आहे. त्याच्याकडे ग्राहकांनी पाठ फिरवल्याने पंपचालकांनी विक्री थांबवली असून साध्या पेट्रोलचीच विक्री सुरू आहे.
डिझेलची घोडदौडदेखील वेगाने सुरू आहे. मंगळवारी सांगलीतील दर ९४.०८ रुपये प्रतिलीटर असा होता. ग्रामीण भागात ९४. ५० रुपयांपर्यंत पोहोचले होते. मालवाहतूकदारांसाठी डिझेलची दरवाढ खूपच मोठी डोकेदुखी ठरली आहे. दरवाढीचा वेग पाहता लवकरच डिझेलदेखील शंभरी गाठण्याची चिन्हे आहेत.
चौकट
सांगलीत मंगळवारचे प्रतिलीटरचे दर
पेट्रोल १०३.४३ रुपये
स्पीड पेट्रोल १०६.२८ रुपये
डिझेल ९४.०८ रुपये
चौकट
ग्राहकांना वाली उरला नाही
लॉकडाऊन काळात उत्पन्न घटले असताना इंधन दरवाढीने खिसा हलका होऊ लागल्याने चिंतेत भर पडली आहे. तेल कंपन्या हजारो कोटी रुपयांचा नफा ग्राहकांच्या खिशातून वसूल करू लागल्या आहेत. त्यांच्यावर कोणाचेच नियंत्रण नसल्याचे दुर्दैवी चित्र आहे. यामध्ये ग्राहकांचेच मरण ओढवत आहे.