सांगली : गेल्या महिनाभरापासून इंधनाचे दर स्थिर आहेत. ग्राहकांसाठी ही बाब दिलासा देणारी ठरली आहे. विशेष म्हणजे सोने आणि चांदीच्या दरात मोठी चढ-उतार होत असतानाही इंधनाचे दर स्थिर राहिले आहेत.
बरोबर महिन्यापूर्वी म्हणजे १८ ऑगस्ट रोजी पेट्रोलचा दर १०७.७२ रुपये होता. त्यामध्ये ७० पैशांची घट होत शनिवारी (दि. १८) १०७.०२ रुपयांना पेट्रोल विकले जात होते. महिनाभरात ७० पैशांची घट म्हणजे मोठा दिलासा देणारी बाब नसली तरी दरवाढ झाली नाही ही महत्त्वाची बाब ठरली आहे.
डिझेलचा भावदेखील स्थिर राहिला आहे. सांगलीत शनिवारी डिझेलचा दर ९४.४७ रुपये प्रतिलिटर होता. ७ सप्टेंबरपासून ६ ते ३२ पैशांचाच कमी-जास्त फरक राहिला. यामुळे मालवाहतूकदारांनी सुटकेचा नि:श्वास सोडला आहे.
गेल्या वर्षभरापासून इंधनाच्या किमती सातत्याने वाढत आहेत. पेट्रोल ९२ रुपयांवरुन १०७ रुपयांवर पोहोचले आहे, तर डिझेल ७९ रुपयांवरुन ९५ रुपयांपर्यंत गेले आहे. गेले वर्षभर इंधनाची भाववाढ दररोजच होत होती. या स्थितीत सप्टेंबरमध्ये दर स्थिर राहिल्याने ग्राहकांना दिलासा मिळाला आहे.
चौकट
पेट्रोल-डिझेलसोबतच सोने व चांदीचे भावदेखील आंतरराष्ट्रीय बाजारातील चढ-उतारांवर कमी-जास्त होतात. गेल्या दोन-तीन आठवड्यांत सोने व चांदीची सतत घसरण होत आहे. पेट्रोल-डिझेल मात्र कमी होत नसल्याकडे पंपचालकांनी लक्ष वेधले आहे. सांगलीत शनिवारी पेट्रोल १०७.०२ रुपये प्रतिलिटर तर डिझेल ९४.४७ रुपये प्रतिलिटर असा दर होता.