लक्ष्मण सरगर/ लोकमत न्यूज नेटवर्क
करगणी : स्वत:चे शिक्षण मुलांच्या साथीने पूर्ण करत जिल्हा बँकेच्या शिपाई पदापासून शाखाधिकारी पदापर्यंतचा आनंदा हिंडे यांचा प्रवास इतरांसाठी प्रेरणादायी ठरला आहे. ते नुकतेच सेवानिवृत्त झाले.
आनंद हिंडे मूळचे नाशिक जिल्ह्यातील. नोकरीनिमित्ताने सांगली जिल्हा बँकेत १९८८मध्ये शिराळा येथे ते शिपाई म्हणून रुजू झाले. जेमतेम दहावी उत्तीर्ण असणारे हिंडे सचोटी व मेहनतीने नोकरी करत मुलांना शिक्षण व्यवस्थित मिळावे, यासाठी झटले. स्वत:च्या अर्धवट राहिलेल्या शिक्षणाची टोचणी त्यांना कायम होती. अशातच मुलांच्यासोबत त्यांनी शिक्षणाची पुन्हा नव्याने सुरुवात केली. मुलांच्या साथीने बारावी ते पदवीपर्यंतचे शिक्षण त्यांनी पूर्ण केले. शिक्षण पूर्ण करत लिपिक ते रोखपाल ते शाखाधिकारी पदापर्यंतचा प्रवास जिद्दीने व चिकाटीने पूर्ण केला.
एका मुलाला डॉक्टर बनवले, तर दुसरा मुलगा सहाय्यक पोलीस निरीक्षक आहे. शिक्षण घेण्याला वय रोखू शकत नसल्याचे उदाहरण हिंडे यांनी घालून दिले आहे. मुलासोबत त्यांनी पदवीपर्यंतचे शिक्षण कला शाखेतून पूर्ण केले आणि ज्या बँकेत शिपाई म्हणून काम केले, त्याच बँकेत शाखाधिकारीपदी रुजू झाले. ते नुकतेच घाणंद शाखेतून सेवानिवृत्त झाले. आनंदा हिंडे याचा जीवनप्रवास अनेकांना प्रेरणा देणारा आहे.