लोकमत न्यूज नेटवर्क
सांगली : जिल्ह्यात कोरोनामुळे प्राणवायूसाठी धावपळ सुरू असल्याच्या स्थितीत दिलासा देणारा निर्णय जिल्हा प्रशासनाने घेतला आहे. सांगली, मिरजेसह पलूस, आटपाडी व कवठेमहांकाळ येथे ऑक्सिजन साठ्यासाठी टाक्या उभारल्या जाणार आहेत.
पालकमंत्री जयंत पाटील यांनी जिल्ह्यातच ऑक्सिजनची व्यवस्था करण्याचे निर्देश दिल्यानंतर प्रशासनाने कार्यवाहीला सुरुवात केली. सध्या मिरज शासकीय रुग्णालयात १२ हजार लिटर क्षमतेची टाकी आहे. सांगलीतील सहा हजार लिटरची टाकी दहा दिवसांत वापरात येईल. त्यापाठोपाठ अन्य आटपाडी, कवठेमहांकाळ व पलूसमध्येही ग्रामीण रुग्णालयांच्या आवारात उभारल्या जातील. पुण्याहून येणारा द्रवरूप ऑक्सिजन तेथे साठविला जाईल. गरजेनुरूप पाईपद्वारे रुग्णांना मिळेल.
मिरजेतील सहा हजार लिटरची साठवणूक क्षमता गेल्यावर्षी ऑगस्टमध्ये दुप्पट करून १२ हजार लिटरवर नेण्यात आली, त्यामुळे तेथील रुग्णांना गरजेनुसार मुबलक प्राणवायू मिळतो. सांगली रुग्णालयात मात्र सिलिंडर वापरावी लागतात.
कोरोना काळात ऑक्सिजनची मागणी दुपटीहून अधिक वाढली आहे. सध्या दररोज सरासरी ३५ ते ४० टन वापर होतो. सांगलीला दोन प्रमुख पुरवठादारांकडून ऑक्सिजन मिळतो, मात्र त्यांची क्षमता तीस हजार लिटरपर्यंतच आहे. त्यामुळे पुण्याहून येणारा ऑक्सिजन एका दिवसातच संपतो. ही तारांबळ टाळण्यासाठी जिल्हाधिकारी डॉ. अभिजित चौधरी यांनी पुण्यातील दोघा उत्पादकांशी करार केले. त्याचा चांगला फायदा होत असून, पुरवठा पूर्णपणे सुरळीत आहे. ऑक्सिजन उपलब्धतेबाबत जिल्ह्यात कोठेही तूर्त अनागोंदी किंवा आणीबाणीची स्थिती नाही.
मिरजेतील एका खासगी कोविड रुग्णालयाने ऑक्सिजनसाठी गतवर्षी स्वतंत्र प्रकल्प उभा केला, परंतु तो अत्यंत छोटा असून, कॉम्प्रेसरच्या धर्तीवर काम करतो. अन्य रुग्णालये मात्र बाहेरील पुरवठ्यावरच अवलंबून आहेत.
सांगली-मिरजेत चारशेहून अधिक रुग्णालये असतानाही ऑक्सिजन निर्मिती प्रकल्पाची गरज कधीही भासली नव्हती. मिरज शासकीय रुग्णालय स्वत:च्या साठवणूक क्षमतेमुळे स्वयंपूर्ण होते, तर सांगलीला पुरवठादाराकडून नियमित पुरवठा होत होता. अन्य खासगी रुग्णालये व सर्व उद्योगांसाठी सध्याचा वीस हजार लिटर क्षमतेचा खासगी प्रकल्प पुरेसा ठरत होता. कोरोनाच्या आणीबाणीत रुग्णालयांची मागणी कित्येक पटींनी वाढल्याने साठवणूक क्षमतेच्या फेरविचाराची वेळ आली आहे.
चौकट
पाच ठिकाणी साठवणूक, निर्मिती नव्हे
जिल्हा प्रशासन नव्याने पाच ठिकाणी साठवणूक केंद्रेे उभी करत आहे. तेथे उत्पादन मात्र होणार नाही. उत्पादन प्रकल्प अत्यंत खर्चिक आहे. कोरोनाची लाट ओसरल्यानंतर तो रिकामा पडून राहणे परवडणारे नसेल.
चौकट
- जिल्ह्याची एकूण ऑक्सिजन साठवणूक क्षमता - ४० हजार लिटर
- शासकीय स्तरावर - १२ हजार लिटर
- खासगी स्तरावर - २८ हजार लिटर
- सध्याची दररोजची मागणी - ३५ ते ४० हजार लिटर