मिरज शहरात भाजीमार्केटचे काम रखडल्याने भाजी विक्रेते रस्त्यावर येत आहेत. रस्त्यावरील विक्रेत्यांना तात्पुरत्या स्वरूपात हायस्कूल रस्त्यालगत असलेल्या खंदकात भाजी मंडईची व्यवस्था करण्याची मागणी ‘मी मिरजकर’ फाऊंडेशनने केली आहे. महापालिका उपायुक्त स्मृती पाटील व तहसीलदार डी. एस. कुंभार यांनी भाजीबाजारासाठी खंदकातील जागेची पाहणी केली आहे. नवीन भाजीमंडईचे काम पूर्ण होईपर्यंत खंदकातील शासकीय जागेत तात्पुरती भाजी मंडई सुरू करण्यासाठी या जागेची स्वच्छत‍ा व सपाटीकरण करण्यासाठी महापालिकेने हालचाली सुरू केल्यानंतर शासनाच्या या जागेवर रातोरात कुंपण घालून अतिक्रमण करण्यांत आल्याचे बुधवारी निदर्शनास आले.
याबाबत ‘मी मिरजकर’ फाऊंडेशनतर्फे तहसीलदार डी. एस. कुंभार यांना निवेदन देऊन शासनाच्या जागेवरील अतिक्रमण हटविण्याची मागणी करण्यात आली. तहसीलदार कुंभार यांनी महापालिका उपायुक्तांना भाजीबाजाराच्या जागेवरील अतिक्रमण हटविण्याच्या लेखी सूचना दिल्या आहेत. उपायुक्त स्मृती पाटील यांनी शहरात सार्वजनिक कामात आणण्यात येणारे अडथळे दूर करण्यात येणार असल्याचे सांगितले. यावेळी सुधाकर खाडे, महादेव कोरे, मनोहर कुरणे, उमेश कुरणे, नितीन सोनवणे, अरुण लोंढे, प्रशांत लोखंडे, सुधीर गोखले उपस्थित होते.
फाेटाे : ०७ मिरज १..२