मिरज : मिरज सिव्हिल कोविड रुग्णालयात गेल्या नऊ महिन्यात ५ हजार कोरोनाबाधित रुग्णांवर उपचार करण्यात आले आहेत. रुग्णसंख्या कमी होत असल्याने ३७५ खाटा असलेल्या कोविड रुग्णालयात सध्या केवळ ४० रुग्ण उपचार घेत असून रुग्ण बरे होण्याचे प्रमाण ९७ टक्क्यावर आहे. कोविड रुग्णांची संख्या घटल्याने नवीन वर्षात नाॅन कोविड रुग्णांवर उपचार कक्ष सुरु करण्यात येणार असल्याचे रुग्णालयाचे अधिष्ठाता डाॅ. सुधीर नणंदकर यांनी सांगितले. रुग्ण कमी झाले तरी कोविड रुग्णालय सुरूच राहणार असल्याचे त्यांनी सांगितले.
जिल्ह्यात कोरोना साथीचा मुकाबला करण्यासाठी मार्च महिन्यात मिरज सिव्हिलधील इतर रुग्णांना सांगलीत स्थलांतरित करुन मिरज सिव्हिलचे कोविड रुग्णालयात रूपांतर करण्यात आले. येथे कोरोना रुग्णांवर उपचारासाठी ३७५ खाटा, ८० डाॅक्टर व २५० परिचारिका कार्यरत आहेत. येथे ३६० रुग्णांना ऑक्सिजन देण्याची व ६ केएल ऑक्सिजन टॅंकची व्यवस्था आहे. गेल्या नऊ महिन्यात कोरोनासंशयित म्हणून ९ हजार ५०० रुग्ण दाखल झाले. त्यापैकी कोरोनाची लागण झालेल्या ५ हजार रुग्णांवर उपचार करण्यात आले.
नऊ महिन्यात रुग्णालयाच्या कोविड प्रयोगशाळेत १ लाख २५ हजार जणांची कोविड तपासणी करण्यात आली. कोरोनामुळे रुग्णालयात सुमारे ६०० जणांचा मृत्यू झाला. कोरोना रुग्णांवर उपचार करणाऱ्या सुमारे ९० डाॅक्टर व वैद्यकीय कर्मचाऱ्यांनाही कोरोना संसर्गाला तोंड द्यावे लागले. नोव्हेंबरपर्यंत फु्ल्ल असलेल्या मिरज कोविड रुग्णालयात सध्या केवळ ४२ रुग्ण उपचार घेत आहेत. मिरज सिव्हिलमधील डॉक्टर व वैद्यकीय कर्मचार्यांनी कोरोनाच्या आव्हानाचा मुकाबला करताना रुग्णांचा मृत्यू दर आटोक्यात ठेवल्याचे अधिष्ठाता डाॅ. सुधीर नणंदकर यांनी सांगितले.
आता डिसेंबरपासून रुग्णसंख्येत घट होत असून दररोज दोन ते चार पाॅझिटिव्ह रुग्ण येत आहेत व तितकेच रोज बरे होत आहेत. आता केवळ १० टक्के रुग्ण असल्याने कोविड रुग्णालय बंद न करता नवीन वर्षात येथे नाॅन कोविड विभाग सुरू करण्याची तयारी सुरू असल्याचेही त्यांनी सांगितले.