सांगली : शाळा, कॉलेजसह सार्वजनिक ठिकाणी तरुणी व महिलांना होणारा रोडरोमिओंचा त्रास कमी करण्यासाठी पुन्हा एकदा निर्भया पथक कार्यन्वित करण्यात आले आहे. कोरोनाचा वाढता संसर्ग व त्यावेळी पोलिसांना असलेल्या वाढीव बंदोबस्तामुळे निर्भया पथकाचे काम थांबले होते. आता पुन्हा एकदा काम सुरू झाले असून जिल्ह्यात सात पथकांद्वारे हे कामकाज चालणार आहे.
कोरोनाचा संसर्ग आवाक्यात येत असल्याने जनजीवन सुरळीत होत आहे. या पार्श्वभूमीवर पोलीस अधीक्षक दीक्षित गेडाम, अप्पर पोलीस अधीक्षक मनीषा दुबुले यांनी पोलीस दलाच्या उपक्रमांनाही सुरुवात केली आहे. त्यानुसार गेल्या दहा महिन्यांपासून थांबलेले निर्भया पथकाचे काम पुन्हा सुरू झाले आहे.
शाळा, महाविद्यालये, क्लासेस आदी ठिकाणी मुलींना तरुणांकडून होणाऱ्या त्रासाला सामोरे जावे लागते. त्यामुळे निर्भया पथक आता साध्या वेशात या भागात आपली गस्त वाढवत हुल्लडबाज तरुणांवर कारवाई करणार आहे.
सांगली शहरात एक पथक कार्यरत असणार आहे, तर इतर जिल्हाभरात असलेल्या निर्भया पथकाची जबाबदारी सहायक पोलीस निरीक्षक प्रज्ञा देशमुख यांच्यावर आहे. एका पथकात दोन पुरुष कर्मचारी, तीन महिला पोलीस कर्मचारी तर एक अधिकारी असणार आहे. सोमवार, दि. १५ पासून बऱ्याच कालावधीनंतर जिल्ह्यातील महाविद्यालयेही सुरू होणार आहेत. त्यामुळे कॉलेज परिसरासह गर्दीच्या ठिकाणी हे पथक कार्यरत असणार आहे.
मुलींना त्रास देण्यासह हुल्लडबाजी करताना अल्पवयीन तरुण आढळून आला तर त्याच्या पालकाला बोलावून थेट समज देण्यात येणार आहे तर इतर तरुणांवर दंडात्मक कारवाईही करण्यात येणार आहे. साध्या वेशातील कर्मचारी या पथकात असल्याने कारवाई करणे सोपे होणार आहे.
कोट
शहरात निर्भया पथकाचे कामकाज पुन्हा सुरू करण्यात आले आहे. तरुणी, महिलांशी गैरवर्तन करणाऱ्यांवर याद्वारे कारवाई करण्यात येणार आहे. कुणाकडून त्रास होत असल्याची तरुणींनीही तक्रार दिल्यास त्यावरही निर्भया पथकाद्वारे कारवाई करण्यात येणार आहे.
-अजित टिके, पोलीस उपाधीक्षक, सांगली