तासगावमध्ये आज राष्ट्रवादीचा मेळावा

पोटनिवडणुकीबाबत चर्चा होणार

तासगाव : माजी उपमुख्यमंत्री आर. आर. पाटील यांच्या निधनामुळे तासगाव-कवठेमहांकाळ मतदारसंघात पोटनिवडणूक होत असून, या पार्श्वभूमीवर उद्या (शनिवारी) तासगावात होणाऱ्या राष्ट्रवादीच्या मेळाव्याकडे सर्वांचे ल्ाक्ष लागले आहे. राष्ट्रवादीचे विधिमंडळ पक्षाचे नेते अजित पवार मेळाव्यात मार्गदर्शन करणार असल्याने, त्यांच्या भूमिकेकडेही मतदारसंघाचे लक्ष लागून राहिले आहे.आर. आर. आबांच्या निधनामुळे, आता कोणाला संधी, याबाबत मतदारसंघात तर्क-वितर्कांना उधाण आले आहे. नुकताच पोटनिवडणुकीचा कार्यक्रमही जाहीर झाल्याने आर. आर. पाटील यांच्या घरातून उमेदवार कोण? निवडणूक बिनविरोध होणार का, याबाबतच्या चर्चा सुरू झाल्या आहेत. गेल्या चार दिवसात जिल्ह्याच्या राजकीय वर्तुळात हाच विषय चर्चिला जात आहे. अजित पवार, माजी मंत्री जयंत पाटील, शशिकांत शिंदे, हसन मुश्रीफ, जिल्हाध्यक्ष विलासराव शिंदे यांच्यासह प्रमुख पदाधिकारी या मेळाव्यास उपस्थित राहणार आहेत. मेळाव्याच्या पार्श्वभूमीवर पक्षाच्यावतीने तयारी करण्यात आली आहे. पोटनिवडणुकीत पाटील यांच्या घरातील उमेदवार आणि निवडणूक प्रक्रियेत पक्षाच्या कार्यकर्त्यांची भूमिका, जबाबदारी हाच मुख्य विषय असणार आहे. राष्ट्रवादीत वरिष्ठ स्तरावर झालेले निर्णय, भविष्यातील वाटचाल अशा वेगवेगळ्या मुद्यांवर या मेळाव्यात चर्चा होणे अपेक्षित आहे. दोन्ही तालुक्यातील पदाधिकारी, कार्यकर्ते या मेळाव्यास उपस्थित राहणार आहेत. पहिल्या टप्प्यात प्रमुखांशी संवाद साधून, नंतर मेळावा होणार आहे. या मेळाव्याकडे सर्वांच्या नजरा लागून राहिल्या आहेत. पदाधिकाऱ्यांशी चर्चा करून निवडणुकीबाबत धोरणात्मक निर्णय होणार आहे. ही पोटनिवडणूक बिनविरोध व्हावी, अशी अपेक्षा जिल्ह्यातील पदाधिकाऱ्यांनी व्यक्त केली आहे. (वार्ताहर)संयुक्त मेळावापोटनिवडणुकीत राष्ट्रवादीची उमेदवारी आणि निवडणुकीत पक्षसंघटनेची जबाबदारी, या मुख्य विषयांच्या अनुषंगाने उद्या तासगावात तासगाव, कवठेमहांकाळ या दोन्ही तालुक्यांच्या कार्यकर्त्यांचा संयुक्त मेळावा आयोजित करण्यात आला आहे.