लोकमत न्यूज नेटवर्क
सांगली : संघर्षाच्या मार्गाने क्रांतीच्या वाटेवरची कुंडलच्या लढवय्या लाड घराण्याची परंपरा अखंडपणे सुरू आहे. यश-अपयशाची पर्वा न करता लढत राहण्याच्या वृत्तीने तब्बल ५८ वर्षांनंतर त्यांच्या घरात पुन्हा आमदारकीने प्रवेश केला.
स्वातंत्र्यसंग्रामात क्रांतिसिंह नाना पाटील यांच्या नेतृत्त्वाखालील प्रतिसरकार चळवळीचे सेनापती व तुफान सेनेचे फिल्डमार्शल क्रांतिअग्रणी जी. डी. बापू लाड यांनी स्वातंत्र्योत्तर काळातही राजकारणातील लढवय्येपणा कायम ठेवला. संयुक्त महाराष्ट्र चळवळीच्या पार्श्वभूमीवर द्विभाषिक मुंबई प्रांतात असलेल्या तासगाव विधानसभा निवडणुकीत जी. डी. बापूंनी शेतकरी कामगार पक्षातर्फे १९५७ मध्ये प्रथम निवडणूक लढविली. काँग्रेसचे दत्ताजीराव भाऊराव सूर्यवंशी यांचा त्यांनी पराभव करून आमदारकी मिळवली. त्यानंतर पुन्हा त्यांनी महाराष्ट्राच्या स्थापनेनंतर १९६२ मध्ये तासगावमधून निवडणूक लढवली. त्यात काँग्रेसचे धोंडिरामनाना पाटील यांनी त्यांचा पराभव केला.
पराभवानंतर शेतकरी कामगार पक्षाने त्यांना १९६२ मध्येच विधानपरिषदेवर संधी दिली. त्यानंतरही सातत्याने ते लढत राहिले. भिलवडी-वांगी विधानसभा मतदारसंघातून त्यांनी १९७८ आणि १९९० मध्ये निवडणूक लढवली. एकदा काँग्रेसचे उमेदवार संपतराव चव्हाण यांच्याकडून, तर दुसऱ्यावेळी डाॅ. पतंगराव कदम यांच्याकडून त्यांचा पराभव झाला. सांगली मतदारसंघातून लोकसभेचीही निवडणूक त्यांनी लढविली होती.
जी. डी. बापू लाड यांनी त्यानंतर सहकार चळवळ, शैक्षणिक आणि सामाजिक कार्यात स्वतःला वाहून घेतले. त्यांचे पुत्र अरुण लाड यांनी २००५ मध्ये राष्ट्रवादीत प्रवेश केला. त्यांनी अनेकदा उमेदवारीसाठी संघर्ष केला. २०१४ मध्ये त्यांनी पुणे पदवीधरची निवडणूक अपक्ष म्हणून लढवली होती, मात्र त्यात त्यांना अपयश आले. आता २०२० च्या निवडणुकीत त्यांना यश मिळाल्यानंतर तब्बल ५८ वर्षांनंतर त्यांनी घरात आमदारकी खेचून आणली.
जी. डी. बापू लाड यांच्या लढती
वर्ष उमेदवार पडलेली मते टक्के निकाल
१९५७ गणपती दादा लाड (शेकाप) २४७३६ ५६.१३ विजयी
दत्ताजीराव भाऊराव सूर्यवंशी(काँग्रेस) १९३३२ ४३.८६ पराभूत
१९६२ धोंडिराम यशवंत पाटील (काँग्रेस) ३३०८९ ६२ विजयी
गणपती दादा लाड (शेकाप) १८९३२ ३५.४७ पराभूत
१९७८ संपतराव अण्णासाहेब चव्हाण (काँग्रेस) ४३१४९ ५२.१९ विजयी
गणपती दादा लाड (शेकाप) २१०९७ २५.३६ पराभूत
१९९० पतंगराव कदम ६४६६५ ५५.१७ विजयी
गणपती दादा लाड (सीपीआय) ४९७३८ ४२.४४ पराभूत