सांगली : चिंचणी यात्रेला जाताना अडविलेल्या २५ घोडागाड्या व सुमारे ८०० दुचाकीस्वारांनी सांगली शहरात मंगळवारी मध्यरात्री धिंगाणा घातला. घोड्यांच्या शेपटीला इलेक्ट्रिक शॉक देत, त्यांना जखमी करून कर्णकर्कश हॉर्न वाजवीत या तरुणांनी शहरभर नागरिकांच्या झोपा उडविल्या. याचे व्हिडिओ बुधवारी व्हायरल झाले. पीपल्स फॉर ॲनिमल संघटनेने या व्हिडिओंची चौकशी करून संबंधित तरुणांवर कारवाई करावी, अशी मागणी केली आहे.
मंगळवारी रात्री एक वाजता चिंचणी यात्रेतून घोडागाडी पळवीत आणणाऱ्या सांगलीच्या पश्चिम भागातील सुमारे ८०० तरुणांनी सांगली शहरात धिंगाणा घातला. या टोळीला कागवाड येथे कर्नाटक सीमेवर रोखण्याचा प्रयत्न झाला होता. त्यांना कागवाड पोलिसांनी मज्जाव केल्याचे समजते. त्यानंतर ते घोडागाड्यांसह सांगलीच्या दिशेने धावले. विश्रामबाग येथे पोलीस गाडी असल्याचे समजल्यानंतर ही टोळी शंभरफुटी रोडला वळली. पत्रकारनगर, भावे नाट्यगृहाच्या बोळातून हे लोक बायपास रस्त्यावर घुसले. शिवशंभो चौकात काही लोकांना पोलिसांनी पाहिल्याचेही समजते. घोडागाडी पळवताना हे लोक घोड्यांना शॉक देत होते. शंभरफुटी व सांगलीच्या पत्रकारनगरातील अनेक लोक या दंग्यामुळे जागे झाले. त्यांना हा प्रकार लक्षात आला नाही.
पीपल्स फॉर ॲनिमल संघटनेचे अध्यक्ष अशोक लकडे यांनी कागवाडपर्यंत मंगळवारी रात्री अशा हुल्लडबाजांवर वॉच ठेवला होता. काही तरुणांना कागवाड सीमेवर अडवून परत पाठविल्याचे त्यांना दिसून आले. मात्र, सांगलीतील घटनेबाबत त्यांना कल्पना नव्हती. त्यांनी यासंदर्भातील चित्रीकरणे संकलित केली आहेत. संघटनेच्या प्रमुखांना पाठवून याबाबत ते तक्रार करणार आहेत.
कोट
मागील वर्षीही आम्ही अशा प्रकाराबाबत पोलीस मुख्यालयात तक्रार केली होती. त्याची दखल पोलिसांनी घेतली नाही. घोड्यांचा छळ करीत हे हुल्लडबाज दरवर्षी असा गोंधळ घालतात. बुधवारी सोशल मीडियावर आलेले व्हिडिओ व चौकांमधील सीसीटीव्ही फुटेज पोलिसांनी तपासून कारवाई करावी.
- अशोक लकडे, अध्यक्ष पीपल्स फॉर ॲनिमल, सांगली