आष्टा : येथील विलासराव शिंदे विलगीकरण केंद्र या ठिकाणी विलगीकरण कक्षात सुमारे १७ रुग्ण आहेत. या ठिकाणी असलेल्या रुग्णांना समाजातील विविध मान्यवर मदत करत आहेत. यामध्ये पालिकेच्या पाणी पुरवठा अधिकारी आसावरी सुतार यांनी रुग्णांना भोजन देत सामाजिक बांधिलकी जपली आहे.
यावेळी नगराध्यक्षा स्नेहा माळी, आष्टा शहर विकास आघाडीचे नेते वैभव शिंदे, माजी नगराध्यक्ष झुंजारराव पाटील, मुख्याधिकारी डॉ. कैलास चव्हाण आदींच्या मार्गदर्शनाखाली सुरू आहे. येथील रुग्णांना चहा व अल्पोपाहार विलासराव शिंदे फौंडेशन व शिवाजीराव पाटील आप्पा पत संस्था देत आहे. मात्र रुग्णांना घरचेच जेवण घ्यावे लागते. या रुग्णांना आसावरी सुतार यांनी स्वतः तयार केलेले भोजन देऊन माणुसकी धर्म जोपासला. त्यांच्या या उपक्रमाचे सर्वत्र कौतुक होत आहे.