सांगली : महापालिकेच्या स्थायी समिती सदस्यपदाचा महापौर दिग्विजय सूर्यवंशी यांनी राजीनामा दिला. त्यांच्या जागी नगरसेवक मगनू सरगर यांची नियुक्ती झाली. पण, स्थायी सदस्यपदाचा मोह महापौरांना सुटलेला नाही. त्यांनी ३१ ऑगस्टपर्यंत सदस्यपदी असल्याचे सांगत सरगर यांना सभेची नोटीस कशी दिली, असा जाब नगरसचिव विभागाला विचारला. अखेर ज्येष्ठ सदस्यांनी हस्तक्षेप करीत हा वाद मिटविला.
महापालिकेच्या स्थायी समितीतील आठ सदस्यांची मुदत ३१ ऑगस्ट रोजी संपणार आहे. महापौर दिग्विजय सूर्यवंशी हेही स्थायी समितीचे सदस्य होते. गतवर्षी सप्टेंबरमध्ये त्यांची दोन वर्षासाठी निवड झाली. यंदा फेब्रुवारीत ते महापौर बनले. त्यामुळे राष्ट्रवादीच्या नेत्यांनी त्यांना स्थायी समिती सदस्यपदाचा राजीनामा देण्यास सांगितले. त्यानुसार काही दिवसांपूर्वी त्यांनी राजीनामाही दिला. नुकत्याच झालेल्या महासभेत नवे आठ सदस्य व महापौरांच्या जागी एका सदस्याची निवड झाली. त्यांच्या जागी राष्ट्रवादीचे ज्येष्ठ सदस्य मगनू सरगर यांना संधी देण्यात आली. नव्या आठ सदस्यांचा कार्यकाल ३१ ऑगस्टनंतर सुरू होणार आहे.
त्यात शुक्रवारी स्थायी समितीची सभा होत आहे. या सभेचा अजेंडा नगरसचिव कार्यालयाने सरगर यांना पाठविला. ही गोष्ट कळताच महापौरांनी नगरसचिवांना जाब विचारला. आपली मुदत ऑगस्ट अखेरपर्यंत आहे, असा त्यांचा दावा होता. ते स्थायी समितीतून निवृत्त झालेले नाही तर, राजीनामा दिला आहे, ही बाब नगरसचिवांसह ज्येष्ठ नगरसेवकांनी त्यांच्या निदर्शनास आणून दिली. राजीनामा दिल्यानंतर त्या दिवसापासून त्यांचे सदस्यपद रद्द होते. याची जाणीव झाल्यानंतर महापौरांनीही माघार घेतली.