सांगली : कुपवाड (ता. मिरज) येथील मटका बुकीच्या अड्ड्यावर स्थानिक गुन्हे अन्वेषण विभागाच्या पथकाने छापा टाकून रोख रकमेसह २ लाख ५८ हजार रुपयांचा मुद्देमाल जप्त केला. याप्रकरणी बुकीचालकासह सहाजणांना अटक करण्यात आली आहे.
अटक करण्यात आलेल्यांत बुकीचालक झाकीर बाबासाहेब मुजावर (वय ४८, रा. बसस्थानकाजवळ, कुपवाड), शकील नसीसाब ढोले (३४, उल्हासनगर), रज्जब मुसा मुजावर (३६, समतानगर), भीमराव बाबूराव शिंदे (६६, समतानगर), दशरथ रामचंद्र जावळे (६०, रा. समतानगर), नासीर कासीम मुश्रीफ (४२, रा. मुजावर गल्ली, मिरज) या सहाजणांचा समावेश आहे.
पोलीस अधीक्षक दीक्षित गेडाम यांनी जिल्ह्यातील अवैध धंद्यांवर कारवाईचे आदेश स्थानिक गुन्हे अन्वेषणचे निरीक्षक सर्जेराव गायकवाड यांना दिले आहेत. गायकवाड यांनी त्यासाठी विशेष पथक नियुक्त केले आहे. गुरुवारी एलसीबीचे पथक मिरज विभागात पेट्रोलिंग करीत असताना कुपवाड एमआयडीसीमधील शिवशक्तीनगर येथे झाकीर मुजावर हा बुकीमालक याच्या घरात मटक्याचा हिशेब सुरू असल्याची माहिती मिळाली. एलसीबीच्या पथकाने मुजावर याच्या घरावर छापा टाकला. यावेळी घरात सहाजण मटका जुगार आकड्याचे मोबाईलवरून प्रिंट काढून हिशेब करीत असल्याचे आढळून आले. पथकाने त्यांच्याकडून मटक्याच्या चिठ्ठ्या, पेन, पॅड, प्रिंटर, स्कॅनर, १२ मोबाईल, दोन मोटारसायकलींसह ५५ हजार ४०० रुपयांची रोकड असा २ लाख ५८ हजार ९८४ रुपयांचा मुद्देमाल जप्त केला. बुकीचालकासह सहाजणांवर गुन्हा दाखल करून सर्वांना कुपवाड एमआयडीसी पोलिसांच्या ताब्यात देण्यात आले.
या कारवाईत सहायक पोलीस निरीक्षक रविराज फडणीस, उपनिरीक्षक अभिजित सावंत, सुधीर गोरे, इरफान मुल्ला, मुद्दसर पाथरवट, सोहेल कार्तीयानी, दीपक गिड्डे, विकास भोसले, वनीता चव्हाण, प्रियांका धुमाळ, बजरंग शिरतोडे यांनी भाग घेतला.