सांगली : कोरोना काळात अनेक प्रकारच्या निर्बंधामुळे रक्तदानाचा प्रवाह मंदावला आहे. त्यामुळे रक्ताचा तुटवडा निर्माण होऊन शस्त्रक्रियांसह अन्य उपचारांना अडचणी येत असल्याने ‘लोकमत’च्या वतीने संपूर्ण जिल्ह्यात २ जुलैपासून ‘ नातं रक्ताचं’ या महारक्तदान शिबिराचे आयोजन केले आहे. २ जुलै रोजी लोकमतच्या सांगली कार्यालयातून याचा प्रारंभ होणार आहे.
ज्येष्ठ स्वातंत्र्यसेनानी जवाहरलालजी दर्डा उपाख्य बाबूजी यांच्या जयंतीनिमित्त दि. २ ते १५ जुलै या कालावधीत ‘नातं रक्ताचं’ हा अभिनव उपक्रम हाती घेण्यात आला आहे. विविध संस्था, संघटना ‘लोकमत’च्या संयुक्त विद्यमाने रक्तदान शिबिराचे आयोजन करीत आहेत. २ जुलै रोजी सकाळी १० वाजता सांगलीच्या राम मंदिर चौकातील ‘लोकमत’च्या कार्यालयात मान्यवरांच्या हस्ते शिबिराचा प्रारंभ होणार आहे.
गेल्या काही महिन्यांपासून लॉकडाऊनच्या निर्बंधांमुळे रक्तदानाचे प्रमाण लक्षणीय घटले आहे. त्यामुळे जिल्ह्यातील रक्तपेढ्यांमध्ये रक्ताचा मोठा तुटवडा निर्माण झाला आहे. रुग्णांच्या नातेवाईकांना रक्त मिळविण्यासाठी धावाधाव करावी लागत आहे. या परिस्थितीत सामाजिक दायित्व म्हणून ‘लोकमत‘ने पुढाकार घेऊन रक्तदान शिबिरांचे आयोजन केले आहे. या शिबिरातून शेकडो रुग्णांचे प्राण वाचणार आहेत. अनेकांना जगण्याचे बळ मिळणार आहे. रक्ताला जात, धर्म, पंथ नसतो. रक्तदानाने माणुसकीचे नाते तयार होते. त्यामुळे रक्तदानाच्या या महायज्ञात दात्यांनी मोठ्या संख्येने सहभागी व्हावे, असे आवाहन ‘लोकमत’ने केले आहे.
चौकट
यांनी करावे रक्तदान
१८ ते ६० वयोगटातील व्यक्ती
कोविड निगेटिव्ह झाल्यानंतर २८ दिवसांनी रक्तदान करता येते.
कोविड प्रतिबंधक लसीचा पहिला किंवा दुसरा डोस घेतल्यानंतर १४ दिवसांनी रक्तदान करता येते.