विकास शहा
लोकमत न्यूज नेटवर्क
शिराळा
: नियतीचा खेळच वेगळा, बिबट्या आला आणि होत्याचे नव्हते करून गेला आणि एका कुटुंबाला व्यवसाय सोडून गावाकडे परत जावे लागले. गेले वर्षभर तळहाताच्या फोडाप्रमाणे जपलेला काळजाचा तुकडा क्षणार्धात डोळ्यांसमोर मातीआड गेला. चिमुकल्याच्या आठवणीने घायाळ झालेल्या मातापित्यांनी जड अंतःकरणाने बाळाचा चेहरा डोळ्यांत व आठवणींना हृदयात साठवून तडवळे गावचा निरोप घेतला.
आनंदगाव (ता. माजलगाव, जि. बीड) येथील शमशुद्दीन निजामुद्दीन शेख हे आपल्या पत्नी व एक वर्षाच्या मुफीयान या मुलासह शिराळा तालुक्यात ऊसतोडणीसाठी आले होते. शमशुद्दीन यास दोन मुले. मोठी मुलगी व लहान मुलगा. मुलगी चार वर्षांची असल्याने ती गावी होती. मुफीयान एक वर्षाचा असल्याने सोबत होता.
सोमवार, दि. २२ रोजी दुपारी १२ वाजण्याच्या सुमारास शमशुद्दीन शेख आपल्या पत्नी व मुलासह ऊसतोडणीसाठी तडवळे येथे शेतात गेले होते. मुफीयानला एका झाडाखाली मेहुणीची सात वर्षांची मुलगी तरनुम हिच्यासोबत ठेवले होते. सर्वजण ऊस तोडण्यात मग्न होते. यावेळी बिबट्याने पाठीमागून सुफीयान याच्यावर झडप घालून त्यास आईवडिलांसमोरच फरफटत नेले. त्यात त्याचा मृत्यू झाला.
शेख कुटुंबीयांवर शोककळा पसरली. गाव जवळ नसल्याने मुफीयानला शिराळा येथेच दफन केले. या ठिकाणी राहिलो तर बाळाच्या आठवणी सतावत राहणार म्हणून शेख कुटुंबाने कोयता सोडून घरी जाण्याचा निर्णय घेतला. या घटनेनंतर त्वरित वनविभागाने मृत बालकाच्या कुटुंबीयांना मदत दिल्यामुळे सर्वत्र समाधान व्यक्त होत आहे.
चाैकट
मदतीचा हात
शेख कुटुंबीयांना सामाजिक कार्यकर्ते डी.जी. आत्तार, सहायक वनसंरक्षक सांगली गजानन चव्हाण, वनक्षेत्रपाल सुशांत काळे, वनपाल चंद्रकांत देशमुख, हणमंत पाटील, युवराज पाटील, खिदमत ग्रुपचे असलम नदाफ, फिरोज मुजावर, आसिफ मुजावर, रफिक आत्तार, झाकीर दिवाण, मुस्लिम समाज ट्रस्ट खलील मोमीन, मेहबूब मुल्ला, ॲडव्होकेट गौस बाबालाल मुजावर यांनी या कुटुंबास मदत केली.
कृपया वरील बातमीतील बाळाचे नाव मुफीयान की सुफीयान हे विचारून घेणे.