कचरावेचक महिलांच्या समस्यांकडे लक्ष वेधण्यासाठी अवनि संस्थेच्या सदस्यांनी सांगलीत जिल्हाधिकारी कार्यालयासमोर निदर्शने केली.
----------
लोकमत न्यूज नेटवर्क
सांगली : कोरोना व लॉकडाऊनमुळे उपासमार होत असलेल्या कचरावेचक महिलांना रोजगार देण्याची मागणी अवनि संस्थेने केली. या मागणीकडे लक्ष वेधण्यासाठी जिल्हाधिकारी कार्यालयासमोर निदर्शने केली. सांगली व मिरज शहरातील कचरावेचक महिलांनी आंदोलनात भाग घेतला.
अवनिचे जिल्हा समन्वयक जैनुद्दीन पन्हाळकर, उपाध्यक्षा अनुराधा भोसले यांनी जिल्हाधिकाऱ्यांना निवेदन दिले. त्यांनी सांगितले की, महापालिका क्षेत्रात ५०४ महिला कचरा गोळा करून पुनर्वापरासाठी उपयोगात आणतात. प्लास्टिक कचऱ्याची मोठी समस्या त्यांच्या कामामुळे सुसह्य झाली आहे. पण कोरोना व लॉकडाऊन काळात त्यांचे हाल सुरु आहेत. कोविड विषाणूचा संसर्ग झालेला प्लास्टिक कचरा संकलित करणे धोक्याचे ठरत आहे. लॉकडाऊनमुळेही कचरा संकलनासाठी बाहेर पडता आलेले नाही. त्यामुळे उपासमार सुरु आहे. त्यांच्यासाठी जिल्हा प्रशासनाने रोजगार उपलब्ध करुन द्यावा.
संघटनेने मागणी केली आहे की, प्रशासनाने जिल्ह्यातील सर्व कचरावेचक महिलांचे सर्वेक्षण करावे, ओळखपत्रे द्यावीत, त्यांच्या बचत गटांना कचरा वर्गीकरणाचे काम द्यावे, वीजबिल माफ करावे, रोजगार द्यावा अथवा बेरोजगार भत्ता मिळावा, मनरेगा योजना शहरी भागातही लागू करावी, वारांगनांप्रमाणे कचरावेचक महिलांनाही मुख्यमंत्री निधीतून पाच हजारांची मदत द्यावी, राज्यातील कचरावेचक महिलांचे कल्याणकारी मंडळ स्थापन करावे.
आंदोलनात सोनाली कांबळे, स्मिता गायकवाड, हिना गोसावी, रुकैय्या पटेल, राधिका झांबरे आदींनी भाग घेतला.
चौकट
१० जानेवारीपासून उपोषण
अवनि संस्थेने सांगितले की, कचरावेचक महिलांच्या मागण्यांविषयी सकारात्मक निर्णय झाला नाही, तर १० जानेवारीपासून जिल्हाधिकारी कार्यालयासमोर बेमुदत उपोषण सुरू केले जाईल.
-----------