आघाडीच्या निर्णयापूर्वीच इच्छुकांचा डंका

सांगली-सातारा विधानपरिषद : काँग्रेस, राष्ट्रवादीच्या बालेकिल्ल्यात भाजपचीही चाचपणी

सांगली : सांगली-सातारा स्थानिक स्वराज्य संस्था गटातील विधानपरिषद निवडणुकीचा कार्यक्रम जाहीर झाल्यानंतर आता काँग्रेस-राष्ट्रवादी आघाडीबाबतची चर्चा सुरू झाली आहे. अद्याप कोणताही निर्णय झाला नसला तरी, दोन्ही पक्षांतील इच्छुकांच्या नावांचा डंका पिटला जात आहे. मतदार संघात ताकदीने कमकुवत असलेल्या भाजपनेही चमत्काराची अपेक्षा ठेवत, चाचपणी सुरू केली आहे. काँग्रेस आणि राष्ट्रवादीचे वर्चस्व असलेल्या या मतदार संघात यापूर्वी अनेक चुरशीचे सामने पाहायला मिळाले आहेत. गतवेळच्या २0१0 च्या निवडणुकीत तत्कालीन मुख्यमंत्री पृथ्वीराज चव्हाण आणि उपमुख्यमंत्री अजित पवार यांच्यातील तडजोडीनंतर ही जागा राष्ट्रवादीला देण्यात आली होती. त्यामुळे याठिकाणी खटावचे माजी आमदार, नेते केशवराव पाटील यांचे जावई प्रभाकर घार्गे यांना संधी मिळाली. ज्या दोन नेत्यांमध्ये तडजोड झाली होती, त्याच नेत्यांनी आता या जागेवर पुन्हा दावेदारी सुरू केली आहे. ही जागा आता काँग्रेसलाच हवी, असे चव्हाण यांनी सांगलीत स्पष्ट केले होते, तर त्यानंतर गत आठवड्यात अजित पवारांनी, ही जागा राष्ट्रवादीचीच असल्याचा दावा केला होता. आघाडीमधील जागेचा हा संघर्ष पेटला असताना, सांगली की सातारा असाही पक्षीय संघर्ष रंगला आहे. संघर्षाच्या या वातावरणातच दोन्ही पक्षांतील इच्छुकांचा डंकाही पिटला जात आहे. काँग्रेसचे ज्येष्ठ नेते माजी मंत्री आ. पतंगराव कदम यांचे ज्येष्ठ बंधू मोहनराव कदम यांचे नाव काँग्रेसकडून पुढे करण्यात आले आहे. काँग्रेसच्या पदाधिकाऱ्यांनी तसा ठरावही प्रदेश कार्यकारिणीकडे पाठविला आहे. काँग्रेसमधून मदन पाटील यांच्या पत्नी जयश्री पाटील यांचेही नाव चर्चेत येत आहे. दुसरीकडे राष्ट्रवादीकडून जिल्हा बँकेचे अध्यक्ष दिलीपतात्या पाटील यांनी निवडणुकीसाठी शड्डू ठोकला आहे. राष्ट्रवादीचे नेते आ. जयंत पाटील यांच्याकडे त्यांनी तशी मागणी केली आहे. सांगली जिल्ह्यात जयंत पाटील आणि सातारा जिल्ह्यात खासदार उदयनराजे भोसले यांना मानणाऱ्या मतदारांची संख्या अधिक आहे. त्यामुळे दिलीपतात्या पाटील यांनी जयंत पाटील यांच्यामार्फत ताकद लावली आहे. सातारा जिल्ह्यातील इच्छुकांनीही प्रयत्न चालविले आहेत. त्यामुळे आघाडीचे काय होणार याकडे आता इच्छुकांचे लक्ष लागले आहे. या निर्णयावर त्यांचे भवितव्य अवलंबून आहे. (प्रतिनिधी) भाजपची तयारी : प्रयत्नांना अर्थ...२००० आणि २००४ मध्ये नानासाहेब महाडिक यांनी या मतदारसंघातून अपक्ष म्हणून निवडणूक लढवून मोठी चुरस निर्माण केली होती. २००० मध्ये कॉँग्रेस नेते मदन पाटील यांच्याविरोधात २३ मतांनी, तर २००४ मध्ये विलासराव शिंदे यांच्याविरोधात ३४ मतांनी त्यांचा पराभव झाला होता. कोणत्याही आमदार, खासदार, नेत्याचा पाठिंबा नसताना महाडिक यांनी निवडणुकीत चुरस निर्माण केल्यामुळे याठिकाणी काहीही करता येऊ शकते, हा इतिहास आहे. त्यामुळेच या निवडणुकीसाठी भाजपने सुरू केलेली चाचपणी अर्थपूर्ण मानली जात आहे. शिवसेना, अपक्ष व आघाड्यांच्या नगरसेवकांच्या बळावर ही जागा जिंकता येण्याचा चमत्कार घडू शकतो, याची खात्री भाजप नेत्यांना आहे. असे आहे मतदारांचे गणित सांगली जिल्ह्याचे मतदान २७१ असून, त्यात सांगली, मिरज, कुपवाड महापालिकेचे ८३ सदस्य, सांगली जिल्हा परिषदेचे ६२, पंचायत समित्यांचे १० सभापती व जिल्ह्यातील नगरपालिकांचे ११६ पदाधिकारी व नगरसेवक यांचा समावेश आहे. सातारा जिल्ह्यात मतदारांची संख्या सांगली जिल्ह्याहून अधिक आहे. तेथील ३११ मतदारांमध्ये जिल्हा परिषदेचे सदस्य ६७, पंचायत समित्यांचे ११ सभापती, नगरपालिकांचे २३३ पदाधिकारी व नगरसेवक यांचा समावेश आहे. आकडेमोड सुरू मतदारांची संख्या, पक्षीय बलाबल आणि नेत्यांचा प्रभाव या सर्व गोष्टी समोर ठेवून दोन्ही कॉंग्रेसमध्ये तसेच चाचपणी करणाऱ्या भाजपमध्ये सुरू झाले आहे. त्यानंतरच पक्षीय निर्णय घेतला जाईल.