शिराळा : शिराळ्यात तयार होणाऱ्या कोरोनावरील इंजेक्शनला मानवीय चाचणीसाठी अजूनही परवानगीची प्रतीक्षा आहे. हे अँटिकोविड सिरम इंजेक्शन बनवणारी आयसेरा बायोलॉजिकल कंपनी याबाबत ड्रग्ज कंट्रोलर ऑफ इंडिया आणि आयसीएमआरकडे मान्यतेसाठी पाठपुरावा करत आहे. कोरोनाच्या नव्या स्ट्रेनवरही हे इंजेक्शन प्रभावी ठरेल, असा दावा या संस्थेच्या शास्त्रज्ञांनी केला आहे.
चीनमध्ये प्रतिजैविकाच्या वापराने मृत्यूचे प्रमाण रोखण्यात यश आले आहे. त्याचाच वापर ही लस बनवताना केला आहे. सर्पदंश, रेबीज, धनुर्वात, घटसर्प, विंचूदंश या रोगांवरील प्रतिपिंडे (प्लाझ्मा) घोड्याच्या रक्तामध्ये त्या रोगाचे विष अथवा जंतू (मृत अथवा निष्क्रिय) टोचून बनवली जातात व रोग्याला दिली जातात. अशी औषधनिर्मिती गेल्या कित्येक दशकापासून होत आहे. ही थेरपी वापरून संपूर्ण भारतीय तंत्रज्ञानाने ‘आयसेरा’ने हे अँटिकोविड सिरम नावाचे इंजेक्शन बनवले आहे.
प्रतापराव देशमुख, दिलीप कुलकर्णी, नंदकुमार कदम, धैर्यशील यादव ‘आयसेरा’चे संचालक असून, हे इंजेक्शन तयार करायला मंजुरी मिळावी, यासाठी त्यांनी पंतप्रधान नरेंद्र मोदी, मुख्यमंत्री उद्धव ठाकरे, आरोग्य मंत्रालय, टास्क फोर्स आणि सिरम कंपनीच्या वरिष्ठ अधिकाऱ्यांशी पत्रव्यवहार केला आहे. ड्रग्ज कंट्रोलर ऑफ इंडिया आणि आयसीएमआरकडे ते मान्यतेसाठी पाठपुरावा करत आहेत.
आयसेरा कंपनीने या औषधाच्या मानवी चाचणीस परवानगी मागितली असली तरी, या कंपनीची ‘नॉलेज पार्टनर’ पुण्याची सिरम कंपनी आहे. सिरमच्या सहभागाशिवाय आयसेराच्या मागणीची दखल घेतली जाणार नव्हती. त्यातच अशा औषधांच्या निर्मितीसाठी देशभरात शंभरावर कंपन्यांनी मागणी केलेली आहे, असे त्यांनी सांगितले.
सप्टेंबर २०२० पासून हे इंजेक्शन तयार करण्यात येत आहे. ते अत्यंत कमी मात्रेमध्ये टोचले तरी याचा गुण येण्यास मदत होईल. वयस्कर व कमी प्रतिकारक्षमतेच्या रुग्णांनाही ते जीवनदायी ठरेल. कोरोनाच्या नव्या स्ट्रेनचे गंभीर रुग्ण, प्रचलित औषधांना प्रतिसाद न देणारे रुग्ण यांच्यासाठी हे प्रभावी औषध ठरू शकेल. सध्या चार लाख लस तयार आहेत. मानवीय चाचणीची परवानगी मिळाल्यास महिन्यास पंधरा ते वीस लाख लस तयार करण्यात येतील, असा विश्वास त्यांनी व्यक्त केला.
इंजेक्शनचे फायदे
कोरोना रुग्ण कमीत कमी दिवसांत बरे होऊन घरी परतण्यासाठी हे इंजेक्शन सलाईनमधून द्यायचे आहे. त्यामुळे केवळ अत्यंत अत्यवस्थ असलेल्या रुग्णांनाच ऑक्सिजन व्हेंटिलेटरची गरज भासेल. याच्या वापरामुळे मृत्यूदर कमी होईल, असा विश्वास संचालकांनी व्यक्त केला.