इस्लामपूर : येथील इंद्रप्रस्थ नागरी सहकारी पतसंस्थेस संपलेल्या आर्थिक वर्षात २ कोटी १० लाख रुपये इतका ढोबळ नफा झाला आहे, तर ६१ लाख ४४ हजार रुपये इतका निव्वळ नफा झाला आहे, अशी माहिती अध्यक्ष युवराज सूर्यवंशी यांनी दिली. सांगली जिल्हा मध्यवर्ती सहकारी बॅँकेचे अध्यक्ष दिलीपराव पाटील या संस्थेचे संस्थापक असून, त्यांच्या मार्गदर्शनाखाली संस्थेची यशस्वी घोडदौड सुरू आहे.
कोरोनासारख्या संकटातही संस्थेने कर्जदार, ठेवीदार, सभासद आणि कर्मचाऱ्यांच्या उत्तम सहकार्याने अतिशय चांगले काम केल्याने संस्थेचा एन.पी.ए. शून्य टक्के राहिला आहे. संस्थेकडे ५५ कोटी २ लाख रुपयांच्या ठेवी आहेत, तर ४१ कोटी ९९ लाख रुपयांचे कर्जवाटप केले आहे. भागभांडवल १ कोटी ६२ लाख रुपये, संस्थेची अन्य बॅँकांतील गुंतवणूक ६ कोटी २ लाख रुपये असल्याचे सूर्यवंशी यांनी सांगितले.
इंद्रप्रस्थच्या इस्लामपुरातील मुख्य शाखेसह सांगली, आष्टा, पलूस, मणेराजुरी आणि शिराळा येथे शाखा कार्यरत आहेत. संस्थापक-मार्गदर्शक दिलीपराव पाटील यांनी शाखा विस्ताराचा निर्णय घेतल्याने आगामी काही महिन्यात इस्लामपूर बसस्थानक परिसर, लाडेगाव फाटा, तासगाव, भिलवडी येथे नवीन चार शाखा कार्यान्वित होणार असल्याचे सूर्यवंशी म्हणाले.
यावेळी उपाध्यक्ष विश्वास धस, संचालक मोहनराव शिंदे, विजयकुमार पाटील, सुहास घोरपडे, जनरल मॅनेजर राजाराम कटारे उपस्थित होते.