लोकमत न्यूज नेटवर्क
सांगली : शहरातील मध्यवर्ती खणभाग, नळभागात सांडपाणी, रस्ते, गटारी, पाण्यासह विविध समस्या होत्या. परंतु तत्कालीन अनेक सत्ताबदल होऊनही कामे झाली नव्हती. भाजपच्या सत्तेत कोट्यवधी रुपयांची विकासकामे होत असल्याचा दावा आमदार सुधीर गाडगीळ यांनी केला. खणभागात विविध विकास कामांचे मंगळवारी त्यांच्याहस्ते उद्घाटन झाले, त्यावेळी ते बोलत होते.
ते म्हणाले, मध्यवर्ती मटण मार्केट, फिश मार्केट सुसज्ज करण्याचा प्रस्तावही तयार आहे. शासनपातळीवर त्याचा पाठपुरावा सुरू आहे. भाजपला संधी दिल्याने जनतेला बदलाचा अनुभव येत आहे. नगरसेविका सुनंदा राऊत व युवानेते सुजित राऊत यांच्या पुढाकाराने ही कामे होत आहेत. त्यासाठी माजी आमदार नितीन शिंदे, अ‍ॅड. स्वाती शिंदे यांचे पाठबळ आहे.
यावेळी चित्रे गल्ली, शेवाळे गल्ली, स्वामी समर्थ मंदिर परिसर, क्षीरसागर गल्ली, धनगर गल्ली, नवप्रभात चौक रस्ता परिसरात आरसीसी गटारी बांधकामे, खणभाग बावडेकर गल्ली रस्त्यावर नवीन ड्रेनेज पाईपलाईन टाकणे आदी कामांना प्रारंभ करण्यात आला.
फोटो ओळी :
खणभाग येथे विविध विकास कामांचे उद्घाटन आ. सुधीर गाडगीळ यांच्याहस्ते करण्यात आले. यावेळी नगरसेविका सुनंदा राऊत, ॲड. स्वाती शिंदे, सुजित राऊत उपस्थित होते.