मिरज : मिरजेत आज, रविवारी सुमारे दोनशे सार्वजनिक मंडळांच्या गणेशाचे विसर्जन होणार आहे. कोरोनाच्या पार्श्वभूमीवर मिरवणुका व वाद्यांशिवाय होणाऱ्या विसर्जनसासाठी शहरात मोठा पोलीस बंदोबस्त तैनात करण्यात आला आहे.
महापालिकेने गणेश तलाव व कृष्णाघाटावर नदीपात्रात विसर्जनासाठी तराफे व बोटींची व्यवस्था केली आहे. कोरोना साथीच्या पार्श्वभूमीवर सार्वजनिक मंडळांनी खासगी जागेत गणेशाची प्रतिष्ठापना केली आहे. शहरात सुमारे ३५० सार्वजनिक मंडळांपैकी रविवारी अखेरच्या दिवशी दोनशे मंडळांच्या गणेशाचे तलावात व कृष्णाघाटावर विसर्जन होणार आहे. विसर्जन मिरवणुकीत वाद्ये व गर्दीला प्रतिबंध करण्यात आला आहे. सायंकाळपर्यंत विसर्जन करण्याच्या सूचना पोलीस प्रशासनाने मंडळांना दिल्या आहेत. विसर्जनासाठी मिरवणूक मार्गावर होणारी गर्दी टाळण्याचे आवाहन प्रशासनाने केले आहे.
मिरजेतील गणेशोत्सवाचे वैशिष्ट्य असलेल्या मिरवणूक मार्गावरील स्वागत कमानी सलग तिसऱ्या वर्षी रद्द करण्यात आल्या आहेत. गणेश विसर्जनासाठी शहरात समतानगर, डॉ. बाबासाहेब आंबेडकर उद्यान व गाडवे चौकासह काही ठिकाणी जलकुंभ व एका फिरत्या जलकुंभाची व्यवस्था व गणेशमूर्ती दान करण्याची सोय महापालिकेने केली आहे. गणेश विसर्जन सोहळा साधेपणाने होणार असला तरीही मिरजेत मोठा पोलीस बंदोबस्त आहे. अतिरिक्त पोलीस अधीक्षकांसह दोन उपअधीक्षक, दहा निरीक्षक, तीस उपनिरीक्षक, तीनशे पोलीस कर्मचारी, गृहरक्षक दलाचे पथक विसर्जन बंदोबस्तासाठी उपस्थित राहणार आहे.
कोरोनाच्या पार्श्वभूमीवर गणेशोत्सव व विसर्जन सोहळ्यावर निर्बंध असल्याने बाप्पांना निरोप देताना दरवर्षीचा उत्साह यावेळी नाही. दोन वर्षांपूर्वी महापूर व त्यानंतर सलग दोन वर्षे कोरोनाचे संकट असल्याने ना मिरवणूक, ना ढोल-ताशा, ना स्वागत कमानी अशा साध्या वातावरणात उत्सव पार पडत आहे.