सांगली : गावगाड्याची सूत्रे हाती घेऊन विकासाच्या वाटेवर गावाला नेण्याचे नियोजन करणाऱ्या कारभाऱ्यांचीच सध्या आर्थिक कुचंबना होऊ लागली आहे. सरपंच, उपसरपंचांना तुटपुंजे मानधन, तर सदस्यांना केवळ चहापानावरच समाधान मानावे लागत आहे. त्यामुळे पदाधिकाऱ्यांच्या मानधनवाढीबरोबरच सदस्यांनाही मानधन सुरू करण्याची मागणी केली जात आहे.
गावगाड्याचे कारभारी म्हणून काम करताना सरपंच, उपसरपंचांना काहीप्रमाणात मानधन मिळते. सदस्यांना मात्र कोणत्याही मानधनाशिवाय काम करावे लागते. दिवसातील बराचसा वेळ गावासाठी देऊनही त्यांच्या पदरी केवळ चहापान येतो. त्यामुळे निवडणुकीतील विजयाच्या उत्साहावर आर्थिक अडचणींमुळे पाणी पडते. सामान्य कुटुंबातून आलेल्या सदस्यांची सर्वाधिक कुचंबना होत असल्याचे दिसून येत आहे. सदस्यांना किमान मानधन मिळाले तर गावाचा गाडा हाकताना त्यांना अधिक बळ मिळेल, अशी भावना व्यक्त होत आहे. अखिल भारतीय सरपंच परिषदेमार्फत गेल्या अनेक दिवसांपासून या प्रश्नावर शासनदरबारी पाठपुरावा सुरू आहे. त्याला अद्याप यश मिळाले नाही.
कोट
गावासाठी जितका वेळ ग्रामसेवक देतात, त्याहून अधिक वेळ पदाधिकारी व सरपंच देत असतात. त्यामुळे ग्रामसेवकाच्या पगाराएवढे सरपंचांना मानधन, त्याखालोखाल उपसरपंच व सदस्यांना मानधन मिळाले पाहिजे.
-प्रदीप माने, सरपंच, सावर्डे, ता. तासगाव
कोट
सरपंच, उपसरपंचांचे मानधन तर वाढले पाहिजेच, मात्र सदस्यांनाही दिले पाहिजे. रोजंदारीवर काम करणाऱ्या मजुरांनाही यापेक्षा अधिक रोजंदारी मिळते. त्यामुळे शासनाने याचा विचार करावा.
- राणी नागरगोजे, सरपंच, नरवाड, ता. मिरज
कोट
कामांची जबाबदारी केवळ सरपंच, उपसरपंच सांभाळू शकत नाहीत, तर सदस्यांनीही एकत्रित काम करायला हवे. त्यामुळे सदस्यांनाही भरीव मानधन मिळायला हवे. सरपंचांच्याही मानधनात वाढ व्हावी.
सुरेखा नाईक, सरपंच, आरग
चौकट
निवडणुका झालेल्या ग्रामपंचायती १५२
निवडून आलेले सदस्य १५०८
निवडून आलेले सरपंच १११