खरसुंडी : खरसुंडी (ता. आटपाडी) येथील विकास सोसायटीच्या इतिहासात प्रथमच एक कोटी ३९ लाख रुपयांचे उच्चांकी कर्जवाटप करून, शेतीउपयोगी वाहनांचे वितरण जिल्हा बँकेचे कार्यकारी संचालक जयवंत कडू-पाटील यांच्याहस्ते करण्यात आले.
यावेळी जिल्हा बँकेचे कार्यकारी संचालक जयवंत कडू-पाटील म्हणाले, जिल्हा मध्यवर्ती बँकेच्या विविध योजनांचा लाभ लाभार्थ्यांनी घ्यावा. बँक ही सर्वसामान्य शेतकऱ्यांची बँक असून वसुलीसाठी तितक्याच जबाबदारीने सहकार्य करावे. बँक आपल्या कर्ज प्रकरणात येणाऱ्या अडचणींचा सकारात्मक विचार करेल.
यावेळी बँकेचे माजी उपाध्यक्ष शशिकांत देठे, बाजार समितीचे सभापती भाऊसाहेब गायकवाड, काँग्रेसचे युवक नेते जयदीप भोसले, बाजार समितीचे संचालक विजय पुजारी, विकास सोसायटीचे अध्यक्ष किशोर पुजारी, माजी अध्यक्ष भगवान भिसे, माजी सरपंच अर्जुन सावकार उपस्थित होते.
संस्थेच्या कार्याचे कौतुक करून पाटील म्हणाले, शासन नोकरभरती करत नसल्याने, बँकेच्या अधिकाऱ्यांवर कामाचा ताण पडत आहे. सर्वसामान्यांपर्यंत बँकेच्या विविध योजनांची माहिती पोहोचत नाही. यासाठी विकास सोसायटीच्या सर्व पदाधिकाऱ्यांनी जिल्हा बँकेशी समन्वय ठेवावा. लाभार्थ्यांना मध्यवर्ती बँकेच्यावतीने कर्ज देण्याचा प्रयत्न करावा.
संस्थेचे अध्यक्ष किशोर पुजारी म्हणाले, तालुक्याच्या पश्चिम भागामध्ये टेंभू योजनेचे पाणी पूर्ण क्षमतेने मिळत असल्याने, शेतीसाठी चांगले दिवस आले आहेत. शेतीपूरक व्यवसायासाठी बँकेने अटी, नियमांमध्ये शिथिलता आणून सहकार्य करावे.
बाजार समितीचे सभापती भाऊसाहेब गायकवाड म्हणाले, शेतकऱ्यांची कर्ज घेताना होणारी वाताहत थांबविण्यासाठी स्थानिक बँक व्यवस्थापकांना जादा अधिकार देण्यासाठी सकारात्मक विचार व्हावा.
नंदकुमार निचळ यांनी आभार मानले.
फाेटाे : ०४ खरसुंडी १