लोकमत न्यूज नेटवर्क
वारणावती : चांदोली धरण परिसरात गेल्या २४ तासात १८५ मिलिमीटर पावसाची नोंद झाली आहे, तर पाथरपुंज येथे ३२९ मिलिमीटर पावसाची नोंद झाली आहे. चोवीस तासात दीड टीएमसीने धरणातील पाणीसाठा वाढला आहे. परिसरात अतिवृष्टी होत असल्याने पाण्याची पातळीही वेगाने वाढत आहे.
सांगली जिल्ह्यातील शिराळा तालुक्याच्या पश्चिम विभागातील चांदोली धरण परिसर पावसाचे आगर समजले जाते. येथे वार्षिक चार ते पाच हजार मिलिमीटर पाऊस पडतोय. गतवर्षी पाटण तालुक्यातील पाथरपुंज येथे चेरापुंजीपेक्षा अधिक पाऊस झाला होता. यंदाही पाथरपुंज येथे गेल्या २४ तासात ३२९ मिलिमीटर पावसाची नोंद झाली आहे.
चांदोली धरणात पाथरपुंजपासूनच्या पाणलोट क्षेत्रातून पाण्याची आवक होत असते. पाणलोट क्षेत्रात धुवाधार पाऊस पडत आहे. पाणलोट क्षेत्रातून सध्या १९ हजार क्युसेक पाण्याची आवक होत आहे. त्यामुळे धरणातील पाणीसाठा वाढत आहे. विसर्गही वाढवला आहे. १ हजार ५३३ क्युसेक विसर्ग वारणा नदीत सुरू आहे. ओढ्या-नाल्यांचे पाणी व धरणातील पाणी यामुळे वारणा नदी दुथडी भरून वाहत आहे.
चांदोली धरणाच्या पाण्याची पातळी ६०३.४० मीटर झाली आहे; तर पाणी साठा १५.१२ टीएमसी असून त्याची टक्केवारी ४३.९५ अशी आहे.
गेल्या २४ तासात १८५ मिलिमीटर पावसासह एकूण २८२ मिलिमीटर पावसाची नोंद झाली आहे. सध्या मुसळधार पाऊस सुरूच आहे. असाच पावसाचा जोर वाढत राहिल्यास धरणातील पाणीसाठा वेगाने वाढणार आहे.
चौकट
धबधबे कोसळले
गेल्या चोवीस तासात दीड टीएमसीने धरणातील पाणीसाठा वाढला, तर पाणी पातळी १.१० मीटरने वाढली आहे.
चांदोली धरण परिसरातील संततधार पावसाने डोंगर-दऱ्यातील धबधबे कोसळत आहेत. परिसर हिरवाईने नटला आहे. हवेत कमालीचा गारठा निर्माण झाला आहे.