करगणी : वाढदिवसाचा खर्च टाळून त्याबद्दल स्पर्धा परीक्षा देणाऱ्या गरजू विद्यार्थ्यांना पुस्तके भेट देण्याचे आवाहन सांगली जिल्हा राष्ट्रवादी काँग्रेस पार्टीच्या जिल्हाध्यक्षा व उन्नती महिला विकास फाऊंडेशनच्या अध्यक्षा अनिता पाटील यांनी केले.
नवीन वर्ष व सावित्रीबाई फुले जयंतीनिमित्ताने सांगली जिल्हा महिला राष्ट्रवादी काँग्रेस व आटपाडी येथील उन्नती महिला विकास फौंडेशनच्या माध्यमातून अनिता पाटील यांनी एक आगळावेगळा उपक्रम राबविला. वाढदिवसाचा खर्च टाळून स्पर्धा परीक्षा देत असणाऱ्या गरीब व गरजू विद्यार्थ्यांना वाचण्यासाठी पुस्तके भेट द्यावीत, त्याचे नियोजन अनिता पाटील करत आहेत. अनिता पाटील या आटपाडी तालुक्यात स्पर्धा परीक्षेची तयारी करणाऱ्या मुलांसाठी मोफत लायब्ररी व मार्गदर्शन केंद्र सुरू करत आहेत. ही पुस्तके लायब्ररीतून मुलांना मोफत दिली जाणार आहेत.
महाराष्ट्र शासनाचा सांगली जिल्हा युवती पुरस्कार अनिता पाटील यांना मिळाला होता. या पुरस्काराची रक्कम अनिता पाटील मोफत लायब्ररीसाठी खर्च करणार आहेत. त्या अनुषंगाने मोफत लायब्ररी व मार्गदर्शन केंद्र स्थापन करण्यासाठी अनिता पाटील यांचे प्रयत्न चालू आहेत.
या उपक्रमास साथ देत शेटफळे येथील प्रा. धनाजी गायकवाड यांनी आपल्या वाढदिवसाचे औचित्य साधत अनिता पाटील यांच्या उपक्रमासाठी पोलीस भरती, राज्य सेवा परीक्षेची पुस्तके अनिता पाटील यांना भेट देऊन एक वेगळा आदर्श घालून दिला.
यावेळी संध्या गायकवाड, राष्ट्रवादी काँग्रेस आटपाडी सोशल मीडिया अध्यक्ष किशोर गायकवाड उपस्थित होते.
फाेटाे : ०६ करगणी १