मिरज : मिरजेत आज दि. १० रोजी सुमारे ३५० सार्वजनिक मंडळांच्या गणेशाची प्रतिष्ठापना होत आहे. कोरोनाच्या पार्श्वभूमीवर शहरात गणेशोत्सव साध्या पद्धतीने साजरा होत असून गणेशोत्सवाचे वैशिष्ट्य असलेल्या स्वागत कमानी सलग तिसऱ्या वर्षी रद्द करण्यात आल्या आहेत. शहरात लक्ष्मी मार्केट ते शनिवार पेठ रस्त्यावर बसणाऱ्या गणेशमूर्ती, सजावट साहित्य, फळांचे, फुलांचे व इतर साहित्य विक्रेत्यांची गर्दी होती.
महापालिकेने रस्त्यावर गणेशमूर्ती विक्रीस प्रतिबंध करुन मिरज हायस्कूलच्या मैदानावर विक्रेत्यांची व्यवस्था केली आहे. कोरोना साथीच्या पार्श्वभूमीवर सार्वजनिक मंडळांना रस्त्यावर मंडप उभारणीस मनाई करण्यात आली आहे. गणेशाचे आगमन व विसर्जन मिरवणुकीत गर्दीला प्रतिबंध करण्यात आला आहे. गणेश तलाव व कृष्णा घाट येथे नदीपात्रात विसर्जनाची व्यवस्था केली आहे. होणारी गर्दी टाळण्याचे आवाहन प्रशासनाने केले आहे. मिरजेत समतानगर वेअर हाउस, डॉ. बाबासाहेब आंबेडकर उद्यान व गाडवे चौकासह शहरात अनेक ठिकाणी जलकुंभात गणेश विसर्जनाची व गणेशमूर्ती दान करण्याची सोय महापालिकेने केली आहे. गणेश भक्तांनी व घरगुती गणपती विसर्जन करणाऱ्या गणेश भक्तांनी पर्यावरण रक्षणासाठी सहकार्य करावे असे आवाहन महापालिकेतर्फे करण्यात आले आहे.