चार वर्षांच्या बालिकेवर अतिप्रसंगाचा प्रयत्न

मिरजेतील घटना : परप्रांतीय तरुणास जमावाचा चोप; आरोपीस अटक

मिरज : मिरजेत ख्वॉजा वसाहतीत चार वर्षांच्या बालिकेवर अतिप्रसंग करण्याचा प्रयत्न करणाऱ्या कुंदन रामविलास सहानी (वय २१) या परप्रांतीय तरुणास नागरिकांनी चोप देऊन पोलिसांच्या ताब्यात दिले. कुंदन सहानी हा ख्वॉजा वसाहतीत भाड्याने राहतो. शेजारी राहणाऱ्या एका बालिकेस शनिवारी रात्री त्याने आपल्या खोलीत नेले व तिच्याशी अतिप्रसंग करण्याचा प्रयत्न केला. बालिकेचा आरडाओरडा ऐकून तिच्या आईने कुंदनला दरवाजा उघडण्यास भाग पाडल्यानंतर हा प्रकार उघडकीस आला. त्यानंतर कुंदनला जमावाने चांगलाच चोप दिला. कुंदन हा मुळचा आसामचा आहे. सौंदर्यप्रसाधनांची फिरून विक्री करण्याचा त्याचा उद्योग आहे. मुलीच्या आईने याप्रकरणी गांधी चौक पोलिसांत फिर्याद दिली आहेय बालिकेचे अपहरण व अतिप्रसंगाचा प्रयत्न केल्याचा गुन्हा दाखल करून कुंदनला पोलिसांनी अटक केली आहे. (वार्ताहर)