सांगली : जिल्ह्यातून द्राक्ष निर्यातीला सुरुवात झाली आहे. गेल्या आठवड्यात मिरजेतील खासगी निर्यातदार कंपनीकडून चार कंटेनरमधून ६० टन द्राक्षे आखातात रवाना झाली. १० जानेवारीपासून निर्यात वेग घेईल. दरम्यान, निर्यातीदरम्यानच्या ७ टक्के कटला पद्धतीविरोधात शेतकरी आक्रमक झाले आहेत.
गेल्यावर्षी मार्चमध्ये लॉकडाऊनच्या नावाखाली व्यापाऱ्यांनी शेतकऱ्यांची अक्षरश: लूट केली. यंदा मात्र तशी स्थिती नाही. लांबलेल्या पावसाने छाटण्या खोळंबून सुमारे २० टक्के बागा वाया गेल्या. त्यामुळे द्राक्षे मुबलक नाहीत. कोरोनावर आरोग्यदायी म्हणून मागणीही चांगली आहे. साहजिकच चांगला दर मिळत आहे.
चौकट
पहिल्याच टप्प्यात दणकेबाज दर
सध्या सुपर सोनाकाला चार किलोच्या पेटीला ३५० ते ४१० रुपये दर मिळत आहे. आरके ३७० ते ४२०, अनुष्का ४०० ते ४२०, मिडीयम सुपर ३२० ते ३५० असा दणदणीत दर आहे. शरदला चक्क ५५० ते ६०० रुपये दर मिळत आहे.
चौकट
कटल्याविरोधात बागायतदार आक्रमक
निर्यातीच्या द्राक्षांमध्ये ७ टक्के कटला घेतला जातो. म्हणजे एकूण द्राक्षांपैकी ७ टक्के खराब म्हणून काढली जातात. घट-तुटीच्या नावाखाली कमी पैसे दिले जातात. याविरोधात शेतकरी आक्रमक झाले आहेत. निर्यातीच्या बागा व्यापाऱ्याकडे उतरणीसाठी देण्यापूर्वी शेतकरी स्वत:च खराब माल बाजूला काढतात, तरीही प्रत्यक्ष हार्वेस्टिंगवेळी पुन्हा ७ टक्के कटला घेतात. अशा व्यापाऱ्यांना हार्वेस्टिंग करु देणार नाही, अशी शेतकऱ्यांची भूमिका आहे. हार्वेस्टिंग करणारी टोळी प्रत्येक गाडीमागे ५०० ते २००० रुपयांची खुशाली घेते. अशा कंपन्या अथवा व्यापाऱ्यांना माल देऊ नये, असे आवाहन करण्यात येत आहे.
कोट
सात टक्के कटल्यामुळे निर्यातीच्या द्राक्षांना स्थानिक बाजारपेठेचाच दर मिळतो. बागेसाठी लाखो रुपये खर्चानंतरही भुर्दंड सोसावा लागतो.
- नागेश कुंभार, बागायतदार, सावळज
कोट
घट, तूट आणि चांगल्या मालाच्या नावाखाली कटला घेतला जातो. यामुळे शेतकऱ्यांची थेट लूट होते. निर्यातीसाठी जिवापाड जपलेल्या बागेतील मालाची नासाडी होते.
- अनिल माळी, बागायतदार, सावळज