विश्वास पाटील यांनी गेल्या अनेक वर्षांच्या अभ्यासपूर्ण संशोधनानंतर ‘अण्णा भाऊंची दर्दभरी दास्तान’ हा ग्रंथ नुकताच लिहून पूर्ण केला. हा ग्रंथ प्रकाशनासाठी पुणे येथे राजहंस प्रकाशनकडे सुपुर्द करण्यात आला. या वेळी आयोजित कार्यक्रमात ते बोलत होते.
या वेळी राजहंस प्रकाशनचे दिलीप माजगावकर, डॉ. सदानंद बोरसे, महाराष्ट्र साहित्य परिषदेचे कार्याध्यक्ष डॉ. मिलिंद जोशी, लेखक सोपान खुडे, प्रभाकर ओव्हाळ, डॉ. संतोष खेडलेकर आदी उपस्थित होते.
हे पुस्तक म्हणजे अण्णा भाऊंचे वाङ्मयीन चरित्र आहे. यात अण्णा भाऊंचा जीवनपट मांडण्याबरोबरच त्यांच्या साहित्यकृतींचे वेगळेपण अधोरेखित केले आहे. अण्णा भाऊंचे हयात असलेले अनेक नातेवाईक, त्यांचा सहवास लाभलेले स्नेही अशा अनेकांशी बोलून हे पुस्तक साकारले आहे, असेही विश्वास पाटील यांनी सांगितले.
दिलीप माजगावकर म्हणाले की, अण्णा भाऊंसारख्या मोठ्या व्यक्तिमत्त्वावर मोठ्या साहित्यिकाकडून जर लेखन झाले, तर मराठी वाचकांपर्यंत अण्णा भाऊ खऱ्या अर्थाने पोहोचू शकतील. याच भूमिकेतून आम्ही हे पुस्तक प्रकाशित करीत आहोत. अगदी लवकरच हे पुस्तक वाचकांच्या हातात येईल, यादृष्टीने नियोजन केले आहे.