लोकमत न्यूज नेटवर्क
इस्लामपूर : शिराळा मतदारसंघातील बहुसंख्य नागरिक रोजगारासाठी मुंबईत वास्तव्यास आहेत. याची फक्त विधानसभा आणि ग्रामपंचायत निवडणुकीपुरतीच नेत्यांना आठवण येते. त्याच पार्श्वभूमीवर शिराळा मतदारसंघातील भाजपचे युवा नेते सम्राट महाडिक यांनी मुंबईत धडक मारली आहे. तेथील डोंगरी भागातील मुंबईत रहिवासी असणाऱ्या नागरिकांशी जवळीक साधून राजकीय ताकद वाढविण्याचा डाव आखला आहे.
इस्लामपूर-शिराळा मतदारसंघात भाजप युवा मोर्चाचे उपाध्यक्ष राहुल महाडिक आणि महाराष्ट्र प्रदेश भाजपचे सदस्य सम्राट महाडिक यांनी वाळवा शिराळा दूध संघाची स्थापना केली आहे. त्यानिमित्त या दोन्ही तालुक्यांसह मुंबईत सभासद नोंदणीचा कार्यक्रम सुरू केला आहे. यानिमित्ताने ते प्रत्येक गावात बैठका घेऊन संपर्क साधत आहेत. त्याला चांगला प्रतिसादही मिळत आहे. शिराळा मतदारसंघात डोंगरी भागातील मतदार शोधणे म्हणजे तारेवरची कसरत करावी लागते. प्रामुख्याने जास्त करून सत्यजित देशमुख यांचा या मतदारांशी नजीकचा संपर्क आहे. त्यानंतर आ. मानसिंगराव नाईक, माजी आमदार शिवाजीराव नाईक यांचे संपर्क नेहमीचेच आहेत. त्यामुळेच सम्राट महाडिक यांनी वाळवा, शिराळा तालुक्यातील नवी मुंबई येथे स्थायिक असलेल्या नागरिकांची बैठक घेऊन दूूध संघाच्या सभासदवाढीसाठी प्रयत्न केला. यावेळी वसंतराज को-ऑप सोसायटीचे अध्यक्ष डॉ. पी. आर. पाटील, ज्योतिर्लिंग पतसंस्थेचे अध्यक्ष बंडूशेठ पाटील, समाजसेवक कृष्णा पाटील, नगरसेवक केदार नलवडे, सुनील मोहिते, तानाजीशेठ चव्हाण, रूपेशशेठ चव्हाण, सुवर्णाताई सावंत, इंद्रजित येडेकर, सुनील मोहिते, भानुदास पाटील, शिवाजी माने, विकास सावंत, विजय गलुगडे, सतीश पाटील, श्रीराम जाधव आदींसह या परिरसरातील बहुसंख्य नागरिक या बैठकीस उपस्थित होते.
फोटो - १६०२२०२१-आयएसएलएम- राजकीय न्यूज
वाळवा, शिराळा येथील तुर्भे (मुंबई) येथे स्थायिक असलेल्या नागरिकांना मार्गदर्शन करताना सम्राट महाडिक.