इस्लामपूर : नरसिंहपूर (ता. वाळवा) येथील दोघांनी विजेच्या मीटरमध्ये फेरफार करून तब्बल ४३ हजारांची रुपयांची वीजचोरी केल्याची घटना उघडकीस आली. वीज वितरणच्या स्थानिक भरारी पथकाने छापे मारून ही वीजचोरी उघड केली.
नंदकुमार मनोहर बारटक्के आणि सोमनाथ रामचंद्र मोहिते (दोघे रा. नरसिंहपूर) अशी वीजचोरी करणाऱ्यांची नावे आहेत. या दोघांवर बारा महिन्यांचा कालावधी निर्धारित करण्यात आला आहे. बारटक्के यांनी १.५९२ केडब्ल्यू इतक्या भाराची २२ हजार ७९० रुपयांची वीजचोरी केल्याचा ठपका ठेवण्यात आला आहे, तर सोमनाथ मोहिते यांनी बारा महिन्यांच्या कालावधीत १९ हजार ६३० रुपये किमतीची एक हजार ४९९ युनिट विजेची चोरी केल्याचे निष्पन्न झाले आहे. या दोघांविरुद्ध विद्युत कायदा कलमाखाली गुन्हे नोंद करण्यात आले आहेत. या दोन्ही गुन्ह्यात कनिष्ठ अभियंता किशोर रामदास निकम यांनी फिर्याद दिली आहे.
निकम यांच्यासह कनिष्ठ अभियंता प्राची गायकवाड, मयूर दाभोळे, कर्मचारी सुनील मडावी, कंत्राटी कर्मचारी सूरज चिवटे यांच्या पथकाने २१ ऑगस्ट रोजी दुपारच्या सुमारास बारटक्के आणि मोहिते यांच्या घरी छापा टाकून तेथील वीज मीटरची तपासणी केली होती. त्यावेळी दोघांनीही विजेच्या मीटरमध्ये फेरफार करून ही वीजचोरी केल्याचे उघडकीस आले आहे.