फाेटाे : ३१ आटपडी १..२..३..४
आटपाडी : मद्यधुंद अवस्थेतील चालकाने भरधाव ट्रक रस्त्याकडेच्या चहाच्या टपरीत घुसवून एकाला चिरडून ठार केले, तर जिवाच्या आकांताने पळ काढल्याने चौघे बचावले. अपघातात दोन दुचाकीसह टपरी आणि रसवंतीगृहाचे सुमारे तीन लाखांचे नुकसान झाले. या अपघातात विक्रमसिंह रवींद्र देशमुख (वय ३२ रा. य. पा. वाडी) या तरुण अभियंत्याचा मृत्यू झाला. अपघातप्रकरणी पाेलिसांनी ट्रक चालक शकील इस्माईल कोकणे (वय ५० रा. माळी गल्ली तासगाव) याला अटक केली आहे.
आटपाडीतील साईमंदिर चौकाजवळ मायाक्कानगर आहे. तिथे बुधवारी सकाळी दहा वाजता हा अपघात झाला. अपघातामध्ये चाैकातील जय गणेश टी स्टॉल व रसपानगृह उद्ध्वस्त केले. ग्राहकांच्या मोटारसायकलींचा चुराडा केला. जिवाच्या आकांताने पळाल्याने समाेरील ग्राहक बचावले. साताराच्या सिद्धनाथ ट्रान्सपोर्टचा ट्रक (क्र. एमएच ११ एम ५९२३) शकील इस्माईल कोकणे (वय ३८ रा. माळी गल्ली तासगाव) हा चालवत होता. जालना येथून लोखंडी सळई घेऊन हा ट्रक आटपाडीमार्गे इस्लामपूरला चालला होता. आटपाडी ते भिवघाट रस्त्यावर मायाकानगर येथे आल्यानंतर तो पिनू लवटे यांच्या जय गणेश टी स्टॉलमध्ये घुसला. ताे थेट या ठिकाणी चहा पिण्यासाठी आलेले ग्राहक श्री सिद्धनाथ इरिगेशन अँड हार्डवेअरचे मालक विजयसिंह रवींद्र देशमुख यांच्या अंगावर गेला. ते जागीच ठार झाले. भरधाव ट्रक पाहून तत्काळ बाजूला पळालेले अन्य ग्राहक सुदैवाने बचावले. चहाची टपरी, तसेच रसपान गृह ट्रकने उद्ध्वस्त केले. महादेव निवृत्ती आलदर (रा.कोळे ता.सांगोला) यांची दुचाकी (क्र.एमएच ४५ यु ३४८), तसेच पिनू लवटे यांची दुचाकी(क्र.एमएच १० डीडी ६४६१)चा चुराडा केला.
आटपाडीचे पोलीस निरीक्षक भोरे सहायक निरीक्षक सुधीर पाटील रोहिदास गबाले उपअधीक्षक अंकुश इंगळे यांनी अपघातस्थळी धाव घेऊन तपासाबाबत सूचना केल्या. चालक शकील काेकणे याला ताब्यात घेतले. विजयसिंह देशमुख यांचे टायटननगर येथे दुकान आहे. सहा महिन्यांपूर्वी त्यांचे लग्न झाले हाेते. घटनेची फिर्याद अशोक सोपान लवटे यांनी दिली आहे. अधिक तपास सहायक निरीक्षक सुधीर पाटील करीत आहेत.