संजयनगर : सांगली शहरातील संजयनगरमधील डॉक्टर लिमये रोड येथील महापालिका सार्वजनिक शौचालयातील मैला गेल्या अनेक दिवसांपासून थेट गटारीत जात आहे. येथील शौचालयाची महापालिकेने दोन वेळा दुरुस्ती करूनही पुन्हा मैला गटारीत जात असल्याने परिसरात दुर्गंधी पसरली आहे. यामुळे नागरिकांचे आरोग्य धोक्यात आले आहे.
महापालिका क्षेत्रात सध्या सर्वत्र स्वच्छता अभियान सुरू आहे. संजयनगर येथील डॉ. लिमये रोड परिसरात महानगरपालिकेची चार सार्वजनिक शौचालये आहेत. या शौचालयातून मैला थेट गटारीत जात आहे. यामुळे परिसरात दुर्गंधी पसरली आहे. आरोग्य विभागाने याठिकाणी वारंवार दुरुस्ती करूनही मैला बाहेर येणे थांबत नाही. येथील काम व्यवस्थित झाले नसल्याने मैला बाहेर पडत असल्याचे नागरिकांचे म्हणणे आहे.
या परिसरामध्ये घाणीचे साम्राज्य निर्माण झाल्याने दुर्गंधी पसरली आहे. डासांचे प्रमाण वाढले आहे. नागरिकांचे आरोग्य धोक्यात आले आहे. प्रशासनाने याची गांभीर्याने दखल घेऊन शौचालयाची दुरुस्ती करण्याबाबत अधिकाऱ्यांना सूचना द्याव्यात, अशी मागणी नागरिकांतून होत आहे
चौकट
चार वेळा दुरुस्ती; लाखाेंचा खर्च
आयुक्त नितीन कापडणीस यांनी पदभार स्वीकारल्यानंतर शहरात स्वच्छता अभियान सुरू असताना दोन वेळा लाखो रुपये खर्च करून या शौचालयाची दुरूस्ती केली आहे. तरीही मैला बाहेर पडत आहे. यापूर्वीही अजित कारचे, नंतर रवींद्र खेबुडकर आयुक्त असतानाही दाेनवेळा या शाैचालयाची दुरुस्ती झाली आहे. गेल्या १७ वर्षांमध्ये चारवेळा या शौचालयाची दुरुस्ती झाली आहे. हे काम चालू असताना बांधकाम विभागाचे कोणीही अधिकारी फिरकले नसल्याने दुरुस्तीचे काम निकृष्ट झाल्याचा नागरिकांचा आराेप आहे. शौचालयाचे दरवाजेही मोडले आहेत.