मिरज : मिरज-पंढरपूर महामार्गावर चोरट्यांच्या टोळीने धुमाकूळ घालत पोलीस असल्याचा बनाव करून वेगवेगळ्या ठिकाणी तिघांना मारहाण करून सुमारे ५० हजारांचा ऐवज लुटला. पोलीस उपअधीक्षकांच्या पथकाने चोरट्यांचा पाठलाग केल्याने म्हैसाळ येथे दुचाकी टाकून चोरटे कागवाडच्या दिशेने पळून गेले. याप्रकरणी चोरट्यांविरुद्ध पोलिसांनी गुन्हा दाखल केला आहे. शुक्रवारी रात्री एकाच दुचाकीवरून आलेल्या चार चोरट्यांनी तानंग फाट्यावर भास्कर पाडुरंग माळी (वय ५५, रा. विसापूर, ता. तासगाव) यांना अडविले. माळी यांना मारहाण करून त्यांच्या खिशातील १६३० रुपयांची रोख रक्कम, अडीच हजार रुपये किमतीचा मोबाईल व त्यांची स्प्लेंडर मोटारसायकल (एमएच १० बीइ ७४७२) काढून घेतली. चोरटे माळी यांची दुचाकी घेऊन कळंबीच्या दिशेने निघून गेले. सिद्धेवाडी खण येथे बाळासाहेब पाटील (रा. पाटगाव) हे ट्रॅक्टर व्यावसायिक नातेवाइकांच्या प्रतीक्षेत एकटेच थांबले होते. मिरजेकडून आलेल्या चोरट्यांनी त्यांना मारहाण करून त्यांच्या खिशातील ६६०० रुपयांची रोख रक्कम, मोबाईल, एटीएम कार्ड, वाहन चालविण्याचा परवाना व दुचाकीची किल्ली हिसकावून घेतली. चोरट्यांनी आणखी पुढे जाऊन खरशिंग फाट्यावर पोलीस असल्याचा बनाव करून पंढरपूरच्या दिशेने जाणारा ट्रक अडविला. ट्रकचालक कैलास बाबूराव शिंदे (४९, रा. जालना) व क्लिनर उमर अब्दुल शेख यांना मारहाण करून ३२ हजारांची रोख रक्कम, दोन मोबाईल असा ऐवज लुटला. एमएच २१ ए ६००९ क्रमांकाच्या ट्रकमधून सोयाबीन भरून ट्रकचालक कैलास शिंदे पंढरपूरला निघाले होते. रात्री सुमारे एकच्या सुमारास ट्रक खरशिंग फाट्यावर आल्यानंतर चोरट्यांनी दुचाकीवरून येऊन पोलीस असल्याचे सांगत ट्रक थांबविण्यास भाग पाडले व लूट केली. लुटमारीच्या घटनेमुळे तेथेच थांबलेले ट्रकचालक कैलास श्ािंदे यांनी रात्रगस्तीला आलेले पोलीस उपअधीक्षक धीरज पाटील यांना माहिती दिल्यानंतर पथकाने मिरजेच्या दिशेने दोन दुचाकीवरून पळून गेलेल्या चोरट्यांचा पाठलाग करण्याचा प्रयत्न केला. पहाटेच्या सुमारास चोरट्यांनी भास्कर माळी यांची चोरलेली दुचाकी म्हैसाळ हद्दीत टाकून दिल्याचे आढळले. तेथून चोरट्यांनी कर्नाटकात पलायन केल्याचा संशय आहे. याप्रकरणी ट्रकचालक शिंदे व बाळासाहेब पाटील यांनी ग्रामीण पोलिसांत, तर भास्कर माळी यांनी औद्योगिक वसाहत पोलिसांत चौघांविरुद्ध जबरी चोरीची फिर्याद दिली आहे. (वार्ताहर) मध्यरात्री लूटमार टी-शर्ट परिधान केलेले चार चोरटे २५ ते ३० वयोगटातील होते. मराठीत बोलणाऱ्या चोरट्यांनी खरशिंग फाट्यावर ट्रकचालकास पोलीस असल्याचे सांगत ट्रक थांबविण्यास भाग पाडले. सिद्धेवाडी खण येथे बाळासाहेब पाटील यांना मारहाण करून काढून घेतलेले एटीएम कार्ड, दुचाकीची किल्ली, वाहन परवाना दंडोबाच्या पायथ्याशी स्टोनक्रशरजवळ टाकून दिल्याचे आढळले. चोरट्यांनी रात्री बारा ते दोनपर्यंत लूटमार करून दहशत निर्माण केली होती.
मिरज-पंढरपूर मार्गावर धूम टोळीचा धुमाकूळ
By admin | Updated: September 19, 2015 23:59 IST