आष्टा/वाळवा : वाळवा येथे पूर्ववैमनस्यातून दोन गटांत तुफान हाणामारी झाली. दाेन्ही गटांकडून तलवार, कोयता, चाकूसारख्या घातक शस्त्रांचा वापर झाल्याने झाल्याने सहाजण गंभीर जखमी झाले. याप्रकरणी अंकुश भगवान अहिर (वय ४७) व नेताजी महादेव फाटक (वय २८, दोघे रा. वाळवा) यांनी आष्टा पोलिसांत परस्परविरोधी फिर्याद दिली आहे. ही घटना शनिवारी, दि. १३ रोजी सकाळी साडे नऊ वाजता घडली. जखमींमध्ये नेताजी महादेव फाटक, रणजित महादेव फाटक, शारदा महादेव फाटक, अंकुश भगवान अहिर, अतुल पाेपट अहिर, राेहन अंकुश अहिर यांचा समावेश आहे.
वाळवा येथील अहिरवाडी रस्त्यावर अहिर व फाटक कुटुंबीय शेजारी राहतात. त्यांच्यात पूर्वीपासून वाद आहे. या वादातून नेताजी फाटक यांनी शरद अहिर यास मारहाण केली होती. त्याची तक्रार देण्यास शुक्रवार दि. १२ रोजी अंकुश अहिर हे शरद अहीर यांच्यासोबत आष्टा पोलीस ठाण्यात आले होते. अंकुश अहिर हे शरदबरोबर आल्याचा फाटक यांना राग होता. शनिवारी सकाळी साडे नऊ वाजता अंकुश व त्याचा भाऊ अतुल हे दुचाकीवरून (क्र. एमएच १० एझेड ४६४१) शेतात निघाले हाेते. यावेळी रणजित फाटक, नेताजी फाटक यांच्यासह त्यांचे वडील महादेव फाटक व अन्य दाेघा अनाेळखींनी त्यांना अडविले. यावेळी दाेन्ही गटांत पुन्हा जाेरदार हाणामारी झाली. तलवारी, चाकूसारखी घातक शस्त्रे घेऊन दाेन्ही गट एकमेकांवर तुटून पडले. यामध्ये नेताजी फाटक, रणजित फाटक, शारदा फाटक, अंकुश अहिर, अतुल अहिर, राेहन अहिर हे जखमी झाले. त्यांना तातडीने आष्टा ग्रामीण रुग्णालयात व नंतर सांगलीच्या शासकीय रुग्णालयात दाखल करण्यात आले. याबाबत अंकुश अहिर व नेताजी फाटक यांनी आष्टा पोलिसांत परस्परविराेधी फिर्याद दिली आहे. याप्रकरणी रणजित फाटक, नेताजी फाटक, महादेव फाटक या तिघांना अटक करण्यात आली असून अधिक तपास सहायक पोलीस निरीक्षक एम. आर. सुतार करीत आहेत.