कुपवाड : सांगली कृषी उत्पन्न बाजार समितीत झालेल्या भ्रष्टाचाराच्या चाैकशीबाबत पणन संचालक सतीश सोनी यांनी जिल्हा उपनिबंधकांची चाैकशी अधिकारी म्हणून नियुक्ती केली आहे. पणन संचालकांना बाजार समितीतील झालेल्या जमीन खरेदी, नोकर भरती, गाळे वाटप व जागा विक्रीसंदर्भात चौकशी करून कारवाईचे आदेश दिले आहेत.
बाजार समितीच्या गैरव्यवहारप्रकरणी कानडवाडी (ता. मिरज) येथील सरपंच अनिल शेगुणशे यांनी पणनमंत्री बाळासाहेब पाटील यांच्याकडे तक्रार केली होती. तक्रारीत म्हटले आहे की, फळे व भाजीपाला मार्केटमधील लिपिकांच्या मालमत्तेची चौकशी करावी, माजी सचिव हुल्याळकर निवृत्त झाले आहेत, तरीही कंत्राटी पध्दतीने त्यांची नेमणूक करून दरमहा पगार दिला जातो. ते बेकायदेशीर आहे, त्यांची वसुली व्हावी, अनुकंपा तत्त्वावर जी नोकरभरती चालू आहे, त्याचीही कार्यवाही पणन संचालकांच्या कार्यालयात प्रलंबित आहे. यासह कृषी उत्पन्न बाजार समितीतील विविध प्रकरणांबाबत शासनाकडे तक्रारी केल्या आहेत.
पणनमंत्री पाटील यांनी पणन संचालकांना बाजार समितीतील भ्रष्टाचाराची चौकशी करून कार्यवाही करावी, असे आदेश दिले आहेत. त्यानुसार पणन संचालकांनी जिल्हा उपनिबंधकांना संबंधित तक्रारीबाबत चौकशी करून योग्य ती कार्यवाही करावी व वरिष्ठांकडे अहवाल सादर करावा, असे आदेश दिले आहेत.
चाैकट
काेट्यवधीचा भ्रष्टाचार
शेगुणशे म्हणाले, बाजार समितीने सावळी (ता. मिरज) येथील गट नं. २०१ ते २०५ ही जमीन खरेदी केली आहे. या व्यवहारात कोट्यवधी रुपयांचा भ्रष्टाचार झाला आहे. याबाबतची तक्रार पणनमंत्री पाटील यांच्यासह पालकमंत्री जयंत पाटील, खासदार संजय पाटील यांच्याकडे केली होती. त्याचबरोबर उमदी (ता. जत) येथील जमीन व्यवहारामध्ये भ्रष्टाचार झाला आहे. विष्णुअण्णा फळे व भाजीपाला मार्केटमधील खुल्या जागेमध्ये गाळे बांधून व विक्री करून भ्रष्टाचार केला आहे. याचीही चौकशी जिल्हा उपनिबंधकांकडून होणार आहे.