जत : जत तालुक्यातील ग्रामीण व जिल्हा मार्गावर रस्त्याकडेला असणारे मार्गदर्शक सूचना फलक काटेरी झुडपे व गावतामध्ये झाकले गेले आहेत. त्यामुळे वाहनधारकांना वळण, गाव, शाळा, पूल याचा अंदाज येत नाही. यातून लहान-मोठे अपघात होत आहेत.
गावालगत रस्त्याकडेला दुतर्फा काटेरी झुडपे वाढली आहेत. यामुळे रस्ते अरुंद झाले आहेत. ही झुडपे प्रवासी नागरिकांसाठी मृत्यूचा सापळा बनत आहेत. बहुतांश रस्ते पक्के व कच्चे आहेत. यावर्षी समाधानकारक पाऊस झाला आहे. यामुळे रस्त्याकडेला दुतर्फा काटेरी झुडपे व गवत मोठ्या प्रमाणात वाढले आहे. त्यामुळे सूचना फलक दिसेनासे झाले आहेत. काटेरी झुडपे काढण्यासाठी सार्वजनिक बांधकाम विभाग, जिल्हा परिषद बांधकाम विभाग यांना शासनाने आदेश द्यावेत व त्यासाठी निधी उपलब्ध करून द्यावा, अशी मागणी नागरिकांतून केली जात आहे.