मिरज : लॉकडाऊनच्या भीतीने मिरजेत बाजारपेठांमध्ये खरेदीसाठी नागरिकांची झुंबड उडाली. अत्यावश्यक वगळता अन्य दुकानदारांवर पोलिसांनी कारवाई केली.
शनिवार व रविवारी वीकेंड लॉकडाऊन संपल्यानंतर सोमवारी सकाळपासून मिरज शहरातील विविध बाजार पेठेत खरेदीसाठी झुंबड उडाली होती. मंगळवारी गुढीपाडवा व संभाव्य लॉकडाऊनमुळे बाजारपेठेत खरेदीसाठी गर्दी करणारे नागरिक कोरोना विसरले होते. महापालिका पथकाकडून कारवाई सुरू असतानाही त्यास कोणी जुमानत नसल्याने फिजिकल डिस्टन्सिंगचा फज्जा उडाला होता. अत्यावश्यक सेवा वगळता अन्य दुकानेही सकाळी उघडल्याने शहर पोलीस निरीक्षक राजू ताशीलदार यांनी पोलीस पथकासह फिरून ही दुकाने बंद केली. दुकाने उघडून नियमाचे उल्लंघन करणाऱ्यावर कारवाई करण्याचा इशारा दिल्याने अत्यावश्यक सेवा वगळता इतर दुकाने बंद झाली. मात्र, भाजी बाजार आणि किराणा दुकानांत गर्दी होती.
आता पुन्हा ७ किंवा १५ दिवसांचा लॉकडाऊन होणार असल्याच्या शक्यतेने नागरिक संभ्रमात होते. सोमवारी सकाळपासूनच लक्ष्मी मार्केट परिसर, लोणी बाजार, दत्त चौक, गाडवे चौक येथे मोठ्या भाजीभाजार सुरू झाला. सराफ पेठही सुरू झाल्याने खरेदीसाठी गर्दी झाली. पोलिसांनी कठोर पावित्रा घेत रस्त्यावरील विक्रेत्यांना पिटाळून लावले. मात्र, काही वेळानंतर पुन्हा बाजार सुरू झाला. लोणी बाजार ते दत्त चौक रस्त्यावर प्रशासनाला न जुमानता भाजीविक्रेत्यांची मोठी गर्दी झाल्याने सोशल डिस्टन्सचा फज्जा उडाला. शहरात बेकऱ्या किराणा दुकानाशिवाय मोबाइल दुरुस्ती, वाहन दुरुस्ती, वाहनांचे सुटे भाग, पुस्तके विक्री यासह इतर दुकाने पोलिसांनी बंद केली. मार्केट सोमवार पेठ शनिवार पेठ किसान चाैक हायस्कूल रस्त्यावरील बाजारपेठात गर्दी होती. मार्केट परिसरात हातगाड्या पुन्हा रस्त्यावर आल्या होत्या. रस्त्यांवर व बाजारात गर्दी करणारे कोरोना संसर्गाचा धोका विसरल्याचे चित्र होेते.