संतोष भिसे-लोकमत न्यूज नेटवर्क
सांगली : डॉक्टर होण्याच्या शेवटच्या पायरीवरच रणजीतला पॅराप्लेजियाने ग्रासले. २४ वर्षांचा हा उमदा तरुण लुळा-पांगळा बनला. त्याला पुन्हा स्वत:च्या पायावर उभे करण्यासाठी सहाध्यायी पुढे सरसावले. क्राऊड फंडिंग सुरू केले. सात लाख रुपये उभे राहिले. माणुसकीच्या या महायज्ञात समाजानेही मदतीची समिधा टाकण्याचे आवाहन डॉक्टरमित्रांनी केले आहे.
पुण्याचा रणजीत धबाले मिरजेच्या शासकीय वैद्यकीय महाविद्यालयाचा २०१५च्या बॅचचा विद्यार्थी. २०१८ मध्ये पाठीत आणि पायात वेदना जाणवू लागल्या. तपासणीअंती मणक्यात गाठ सापडली. अत्यंत जोखमीच्या शस्त्रक्रिया आवश्यक होत्या, पण कुटुंबाने धीर सोडला नाही. पुण्यात खासगी नोकरी करणाऱ्या वडिलांनी आयुष्यभराची पुंजी पणाला लावली. लागोपाठ दोन शस्त्रक्रिया झाल्या. १५ लाख रुपये संपले. गाठ निघाली, पण पायांची विकलांगता कायम आहे. दोन्ही पायांत पुरेशा संवेदना नाहीत.
पॅराप्लेजिया म्हणजे एक प्रकारे लकवाच. त्याने रणजीतच्या हालचाली थांबल्या, पण शिक्षण मात्र थांबले नाही. त्याचे सहाध्यायीच हातपाय बनले. रणजीतची सुश्रुषा करण्यापासून व्हीलचेअरवरून वर्गात नेईपर्यंत मित्रांनी जबाबदारी पेलली. तेजतर्रार बुद्धिमत्तेच्या रणजीतने मित्रांचा विश्वास सार्थ ठरवला. एमबीबीएस यशस्वीरीत्या पूर्ण केले. डॉक्टर झाला, पण इंटर्नशीप बाकी होती. त्यासाठी प्रत्यक्ष रुग्णालयात काम करणे गरजेचे होते. विकलांग रणजीतला ते शक्य नव्हते. यावेळीही मित्र सरसावले.
दिल्लीतील आयबीएस रुग्णालयात रोबोटिक सायबरडाईन थेरेपीचे यशस्वी उपचार होऊ शकतात हे समजले. त्यासाठी २३ लाखांवर खर्च अपेक्षित होता. मित्रांनी क्राऊड फंडिंग मोहीम सुरू केली. मिलाप संकेतस्थळावर रणजीतचा संघर्ष अपलोड केला. मदतीचे आवाहन केले. खटाटोपाला यश आले. सात लाख ११ हजार रुपयांचा निधी उभा राहिला. प्राध्यापक, कर्मचाऱ्यांसह अमेरिका, इंग्लंडमधूनही हात पुढे आले. मिरज आयएमएने पुढाकार घेतला. त्यांच्या माध्यमातून महाराष्ट्र आयएमए पुढे येत आहे. मिरज वैद्यकीय महाविद्यालयातून बाहेर पडलेल्या शेकडो डॉक्टर्सनी मदतीच्या महायज्ञात भाग घेतला आहे. अद्याप १६ लाख रुपये गोळा व्हायचे आहेत.
कोट
भविष्यात डॉक्टर होऊन समाजाच्या सेवेत वाहून घेणाऱ्या डॉ. रणजीतला मदतीची नितांत गरज आहे. उमेदीच्या वयातला तरुण अंथरुणाला खिळून राहणे वेदनादायी आहे. मदतीचे हात पुढे येण्याची गरज आहे.
- प्रा. प्रिया प्रभू-देशपांडे, सहयोगी प्राध्यापक, मिरज शासकीय वैद्यकीय महाविद्यालय