संख : सोन्याळ (ता. जत) येथे चंदनाचे झाड चोरण्याचा प्रयत्न करणाऱ्या चाैघांना पकडण्यात आले. त्यांच्याकडून दोन मोटारसायकली, कुऱ्हाड आदी साहित्य जप्त केले आहे. ही घटना गुरुवारी रात्री ८ वाजता घडली.
सचिन प्रल्हाद कांबळे, लक्ष्मण नारायण भोसले, राजू गजानन पवार, सदाशिव सुखदेव डिसकळ (सर्व रा. कोळगिरी, ता.जत) या संशयितांवर उमदी पोलीस ठाण्यात गुन्हा दाखल करण्यात आला आहे.
सोन्याळ अंकलगी रस्त्यावर ओढापात्रालगतच्या बांधावर चंदनाची झाडे आहेत. या ठिकाणी रात्री आठ वाजता चिदानंद श्रीशैल मुचंडी शेतीतील डाळिंबास ड्रीपने पाणी सोडत होते. यावेळी त्यांना दुचाकीसह चाैघे दिसले. ते चंदनाच्या झाडाची चोरी करण्यास आल्याचा संशय आल्याने मुचंडी यांनी उमदी पोलिसांना माहिती दिली. पोलिसांनी घटनास्थळी येऊन धाड टाकली. त्यावेळी चंदनाची झाडे चोरी करण्याचा प्रयत्न करीत असताना सचिन प्रल्हाद कांबळे याला पकडले. घटनास्थळी दोन दुचाकीसह कुऱ्हाड जप्त केली. तिघेजण पळून गेले होते. रात्री पोलिसांनी त्यांचा शोध घेऊन पकडले. उमदी पोलीस ठाण्यात गुन्हा दाखल केला आहे. याबाबत फिर्याद चिदानंद श्रीशैल मुचंडी यांनी दिली आहे. अधिक तपास पोलीस हवालदार विनायक माळी करीत आहेत.