नागपंचमीनिमित्त जिवंत साप पकडून प्रदर्शन करणाऱ्यांविरुद्ध तक्रार

राज्यात नागपंचमी मोठ्या प्रमाणावर साजरी होते. या सणानिमित्त काही सर्पमित्र व गारुडी लोक पैसे कमावण्यासाठी जिवंत साप पकडून दात काढून, सापाचा अमानुष छळ करतात. घरोघरी जाऊन लोकांना साप दाखवून हळदी-कुंकू लावून पूजा करायला सांगतात. सापाला दूध पाजायला सांगून पैसे मागतात. दरवर्षी राज्यात असे प्रकार सुरु आहेत. साप दूध पित नाही व दूध पिल्याने सापाच्या जिवास धोका आहे. हळदी कुंकवातील रसायनामुळे सापाला त्रास होतो. समाजात अंधश्रद्धा पसरवून गारुडी व काही सर्पमित्र पैसे कमावत आहेत. जिवंत साप पकडून सापाचे खेळ, साप डांबून ठेवणे, प्रदर्शन करणे भारतीय वन्यजीव संरक्षण कायद्यानुसार गुन्हा आहे. यासाठी तीन ते सात वर्षांपर्यंत शिक्षा व १० ते २५ हजार रुपये दंड असल्याचे अ‍ॅड. बसवराज होसगौडर यांनी सांगितले.