इस्लामपूर : नूतन जिल्हाधिकारी शेखर गायकवाड यांचे पदभार स्वीकारण्यासाठी प्रस्थान होत असताना, त्यांच्या इस्लामपूर भेटीच्यावेळी पहिल्यांदा स्वागत करुन येथील काँग्रेसच्या कार्यकर्त्यांनी इस्लामपूर नगरपालिकेच्या कारभाराविरुध्द ३ तक्रारी केल्या. त्यामुळे जिल्हाधिकाऱ्यांकडे पालिकेविरुध्द तक्रार करून येथील कारभाराकडे त्यांचे लक्ष वेधण्याचा प्रयत्न केला.गायकवाड यांनी मध्यवर्ती प्रशासकीय कार्यालय इमारतीमधील प्रांत कार्यालयास भेट दिली. प्रांताधिकारी डॉ. विजयसिंह देशमुख, तहसीलदार रूपाली सरनोबत यांनी त्यांचे स्वागत केले. अधिकाऱ्यांच्या भेटीनंतर तेथे काँग्रेसचे विधानसभा क्षेत्र युवक अध्यक्ष विजय पवार, शहर उपाध्यक्ष राजेंद्र शिंदे यांनी गायकवाड यांचे स्वागत करून शहरात सुरु असलेल्या निकृष्ट दर्जाच्या रस्ते डांबरीकरणाच्या कामाची चौकशी करावी, अशी मागणी केली. तसेच एकात्मिक गृहनिर्माण सुधारणा योजनेंतर्गत बांधलेल्या २४० घरकुलांचा दर्जा निकृष्ट आहे. त्याचीही स्वतंत्रपणे चौकशी करुन दोषींवर कठोर कारवाई करावी.१७ जानेवारी रोजी घरकुल व व्यापारी संकुलाचा उद्घाटन कार्यक्रम शासकीय असताना निमंत्रण पत्रिकांमधून खा. राजू शेट्टींचे नाव वगळले. राष्ट्रवादीचाच कार्यक्रम, असे स्वरुप देण्यात आल्याने कार्यक़्रमाच्या खर्चाची वसुली मुख्याधिकारी, नगराध्यक्ष, पक्षप्रतोदांकडून करण्यात यावी, अशीही मागणीही त्यांनी केली आहे. (वार्ताहर)
जिल्हाधिकाऱ्यांच्या स्वागतालाच इस्लामपूर पालिकेविरुध्द तक्रार
By admin | Updated: March 12, 2015 23:54 IST