आष्टा : आष्टा शहरातील सर्व नागरिकांनी स्वच्छ शहर सुंदर शहर अभियान राबविण्यासाठी पालिकेला सहकार्य करावे, परिसराची स्वच्छता राखावी, असे आवाहन वाळवा पंचायत समितीच्या माजी उपसभापती भाग्यश्री शिंदे यांनी केले.
आष्टा नगरपरिषेदेच्या महिला व बालकल्याण समितीच्यावतीने स्वच्छ सर्वेक्षण २०२१ व माझी वसुंधरा अभियान अंतर्गत महिलांसाठी प्रबोधनात्मक कार्यक्रमाच्या उद्घाटनप्रसंगी भाग्यश्री शिंदे बोलत होत्या. आष्टा शहर विकास आघाडीचे नेते वैभव शिंदे, नगराध्यक्षा स्नेहा माळी, उपनगराध्यक्षा तेजश्री बोंडे, मुख्याधिकारी डॉ. कैलास चव्हाण, महिला बालकल्याण सभापती शारदा खोत, उपसभापती पुष्पलता माळी, झीनत अत्तार, आसावरी सुतार, सारिका खोत, डॉ. प्रज्ञा पाटील यांच्यासह मान्यवर उपस्थित होते.
डॉ. कैलास चव्हाण म्हणाले, आष्टा पालिकेने राज्यात संत गाडगे बाबा अभियानात द्वितीय क्रमांक मिळविला होता. शहराचा देशात पुन्हा स्वच्छता अभियानात वरचा क्रमांक मिळविण्यासाठी पालिकेच्या विविध उपक्रमांना साथ द्यावी.
यावेळी आयडीबीआय बँकेच्यावतीने ओला व सुका कचरा ठेवण्यासाठी डस्टबीन वाटप करण्यात आले. रोपाला जल अर्पण करून सुरुवात झाली. भारुडासह विविध मनोरंजनाचे कार्यक्रम झाले. विजेत्यांना बक्षीस देऊन गौरविण्यात आले. शारदा खोत यांनी स्वागत केले. आसावरी सुतार यांनी प्रास्ताविक केले, तर पुष्पलता माळी यांनी आभार मानले.
प्रतिभा पेटारे, लता पडळकर, संगीता सूर्यवंशी, मंगल सिद्ध, मनीषा जाधव, रुक्मिणी अवघडे, रागिनी सावंत, विमल थोटे, सारिका मदने, अर्जुन माने, सतीश माळी, शेरनवाब देवळे, अनिल बोंडे, सचिन मोरे यांच्यासह महिला उपस्थित होत्या.
फोटो : २९०१२०२१-आयएसएलएम-आष्टा पालिका न्यूज
आष्टा पालिकेच्यावतीने स्वच्छ सर्वेक्षण व माझी वसुंधरा अभियानांतर्गत आयोजित सांस्कृतिक कार्यक्रमातील विजेत्यांचा गौरव भाग्यश्री शिंदे, नगराध्यक्ष स्नेहा माळी यांच्या हस्ते करण्यात आला. यावेळी तेजश्री बोंडे, झीनत आत्तार, शारदा खोत, पुष्पलता माळी, आसावरी सुतार, सारिका खोत, लता पडळकर, संगीता सूर्यवंशी, मनीषा जाधव उपस्थित हाेत्या.