एसटीचे चालक ही आपली नोकरी न समजता समाजाचे व्रत मानून माणिक यादव यांनी ३६ वर्षे प्रवाशांची अविरत सेवा केली. या प्रदीर्घ सेवेनंतर माणिकदादा सोमवारी सेवानिवृत्त झाले. आपल्या सेवेतील शेवटच्या दिवशी निरोप घेताना त्यांनी आपल्या लाडक्या लालपरीला घट्ट मिठी मारली, तसेच एसटीतील गणपतीबाप्पाच्या प्रतिमेसमोर हात जोडून नतमस्तक होताना माणिकदादांना गहिवरून आले. माणिकदादांच्या एसटीच्या एकनिष्ठ प्रेमाबद्दल ‘लोकमत’ने ‘लाल परीला अखेरचा दंडवत आणि माणिकदादांच्या डोळ्यांत आले अश्रू’ या मथळ्याखाली बातमी प्रसिद्ध केली होती. ‘लोकमत’मधील ही बातमी वाचूनच मुख्यमंत्री ठाकरे यांनीही बुधवारी दुपारी ४ वाजता दूरध्वनी करून आपली एसटीशी नाळ घट्टपणे जोडल्याबद्दल कौतुक केले, तसेच सेवानिवृत्तीच्या पुढील वाटचालीस त्यांनी माणिकदादांना शुभेच्छाही दिल्या. एसटीवरील प्रेमाची व निष्ठेची दखल परिवहनमंत्री तथा एसटी महामंडळाचे अध्यक्ष ॲड. अनिल परब यांनी घेतली. त्यांनी यादवदादांना फोन करून शुभेच्छा दिल्या. आपण गेली अनेक वर्षे मनापासून जी सेवा केलीत, त्याबद्दल तुमचे मनापासून कौतुक करतो. तुमच्यासारख्या कर्तव्यदक्ष व निष्ठावान कर्मचाऱ्यांच्या प्रेमामुळे एसटीची वाटचाल यशस्वीपणे सुरू आहे, असे कौतुकोद्गार त्यांनी काढले.
चौकट
एसटीच्या कुटुंबाचा तुम्ही एक घटक
ॲड. अनिल परब यांनी दूरध्वनीवरून माणिकदादांशी संपर्क करून तुम्ही कागदोपत्री सेवानिवृत्त झाले आहात; पण प्रत्यक्ष तुम्ही एसटीच्या कुटुंबातील एक घटक असल्यामुळे नेहमी एसटीबरोबरच असणार आहात. तुम्हाला कधीही अडचण भासल्यास आमच्याशी संपर्क करा, तुमच्याबरोबर आम्ही आहोत, अशी कौतुकाची थाप परिवहनमंत्र्यांनी माणिकदादांना दिली.