सांगली : कोरोनाचा संसर्ग वाढू लागल्याने यंदा शिवजयंती साजरी करताना सर्वच मंडळांनी नियमांचे पालन करावे. रॅली, मिरवणुका न काढता रक्तदान शिबिर, स्वच्छतेबाबत जनजागृतीचे उपक्रम हाती घ्यावेत, असे आवाहन पोलीस अधीक्षक दीक्षित गेडाम यांनी मंगळवारी केले.
शिवजयंतीच्या पार्श्वभूमीवर पोलीस प्रशासनाच्यावतीने शहरातील विविध मंडळांच्या पदाधिकाऱ्यांची बैठक आयोजित केली होती. यावेळी अप्पर पोलीस अधीक्षक मनीषा दुबुले, उपअधीक्षक अजित टिके, अशोक वीरकर उपस्थित होते.
यावेळी प्रमोद इनामदार, नितीन गोंधळे, आसिफ बावा, उत्तम कांबळे, सदानंद कबाडगे, ऋषिकेश पाटील, संभाजी पाटील, डाॅ. संजय पाटील, इरफान बारगीर, अशोक माने यांनी मते मांडली.
शासनाने यंदा शिवजयंती साधेपणाने साजरी करण्याची सूचना केली आहे. पोवाडा व इतर सांस्कृतिक कार्यक्रम, मिरवणुकांवर बंधने आहेत. १०० व्यक्तींच्या उपस्थितीत शिवजयंती साजरी केली जाणार आहे. मंडळांनी प्रतिबंधक उपाययोजना, स्वच्छतेबाबत जनजागृती करून आरोग्य शिबिरांचे आयोजन करावे, उत्सवाला कुठेही गालबोट लावू नये, अशा सूचनाही पोलिसांच्यावतीने देण्यात आल्या.
चौकट
मिरवणुकांना परवानगी द्या
बहुतांश मंडळांच्या पदाधिकाऱ्यांनी, यंदा शिवजयंती मिरवणुकांना परवानगी देण्याची मागणी बैठकीत केली. राजकीय पक्षांच्या मेळाव्यात कुठेही बंधने नाहीत. पण व्याख्याने, सांस्कृतिक कार्यक्रमांना बंधने घातली आहेत. ध्वनिक्षेपक, मिरवणुकांना बंदी आहे. या अटी शिथिल करण्याची मागणी यावेळी करण्यात आली.